"သူတို့ ဒီဘက်ကို မတက်ကြဘူး တပ်မှူး"
"ဒါဆို ချောင်းအတိုင်း သွားကြမှာပေါ့"
ငသင် ချောင်းရိုးထဲ ဆင်းသွားပြီး လိုက်စမ်းသည်။
"ဒီချောင်းက ရွှံ့နဲ့ကျောက် ရောနေတော့ အောက်လည်း မမြင်ရ၊ မြေကိုစမ်းလို့လည်း ခြေရာခွက် မစမ်းမိ ဖြစ်နေပါတယ်။ သို့သော် စမ်းမိသလောက် သူတို့ သည်နေရာအရောက်မှာ ချောင်းအထက်ရော အောက်ပါ နှစ်ဖွဲ့ခွဲသွားကြပုံပါပဲ"
"လွယ်တဲ့သူတော့ ဟုတ်ဟန်မတူ၊ ဘယ်ဘက်ကို အများ သွားကြသလဲ"
"ချောင်းညာဘက်ကို ပိုတက်ဟန် တူပါတယ်"
"အင်အားများတဲ့ဘက်ကို လိုက်ရင် ခေါင်းဆောင်သူကို တွေ့ရမှာပဲ။ ဒါပေမယ့် အခြေအနေက ပုံမှန်မဟုတ်တော့ သူတို့ကို လျှော့မတွက်သင့်ဘူး။ သေသေချာချာ သိရမှ ဆုံးဖြတ်လို့ရမယ်။ လူနည်းတဲ့ဘက် လိုက်ပြီး ဖမ်းကြတာပေါ့"
သူတို့လူအုပ်သည် ဘယ်ဘက်သို့ ချိုးကွေ့လိုက်ကြပြီး ချောင်းအတိုင်း ခရီးဆက်ကာ မြေနီလမ်းတစ်ခု တွေ့ရသည့်နောက်သို့ လိုက်သွားကြသည်။ ရှေ့တွင် မြင်းသည်တစ်စုသည် မြင်းများကို အစာရေစာ တိုက်ကျွေး အနားပေးထားကြကြောင်း တွေ့ရ၏ ။ အဝတ်တန်ဆာများမှာ သူတို့ဘီလူးတပ်အတိုင်း ဖြစ်သော်လည်း မြန်မာများ မဟုတ်ကြ။
ထို့ကြောင့် ရှမ်းမင်းသားကဲ့သို့ ဝတ်ဆင်ထားသည့် လက်ျာဘီလူးတို့ ရုတ်တရက် ရောက်ရှိ ဝိုင်းပိတ်ထားလိုက်သောအခါ ထိုသူတို့သည် အံ့သြနေကြ၏ ။ ခုခံရန် ကြံသေးသော်လည်း အင်အားချင်း မမျှသည့်အပြင် အဆင်သင့် မဖြစ်ကြသေး၍ အဖမ်းခံလိုက်ရသည်။
စစ်မေးချက်များအရ ငသူရိန် သူတို့လက်ထဲ ရောက်နေကြောင်း သိရသည်။ ငသူရိန် ပြောသည့်အတိုင်း ပြင်ဆင် ဝတ်စားလျက် မြန်မာတပ်များဟန် ဆောင်နေကြောင်းလည်း ပေါ်ပေါက်၏ ။ လက်ျာဘီလူးက ရှမ်းမင်းသား၏ ဉာဏ်ကို သဘောကျသွားသည်။
"ဒီအတိုင်းဆို အတော် သတိထားရမယ့်ကိန်းပါလား။ ငါနဲ့ ပုံစံတူ အကြံဉာဏ်တူသူ တစ်ဦး ဖြစ်လိမ့်မယ်။ သူ့ဘက်က သာမသွားအောင် အင်မတန် ခက်ခက်ခဲခဲ ကြံစည် လုပ်ကိုင်ရလိမ့်မယ် ထင်ပါရဲ့"
ထိုနေ့က သူတို့ အပူတပြင်း အစီအစဥ်သစ်များ ရေးဆွဲ တိုင်ပင်ကြ၏ ။ ရှိသည့် လူ ၂၀ နှင့် သုံ့ပန်းများကို အသုံးချ၍ ထိခိုက်မှု အနည်းဆုံးဖြင့် ရှမ်းမင်းသားအား ဖမ်းဆီးနိုင်ရန် နည်းလမ်းပေါင်းစုံ ဆွေးနွေးခဲ့ရသည်။
ခွန်လောင်သည် ခိုင်မာတောင့်တင်းသော ခံတပ်ရှိသည့် ရွာကြီး၌ စခန်းချနေခိုက် ကင်းစခန်းဆီမှ အော်သံကြားရသည်။
"မြန်မာတပ်တွေ လာနေပြီ"
ထိတ်ထိတ်ပျာပျာ ဖြစ်သွားကြသော်လည်း အော်သံက ချက်ချင်းပြောင်းသွား၏ ။
"မဟုတ်ဘူး၊ တို့တပ်တွေပဲ။ အယောင်ဆောင် ရှမ်းတွေကို ဖမ်းလာတာဟေ့"
ရွှင်ရွှင်မြူးမြူး အော်သံကြောင့် ခွန်လောင် ပြေးထွက်ကြည့်သည်။ ရွာအဝင်တံခါးကြီး ပွင့်သွားပြီး မြန်မာဝတ်စုံ ဝတ်ဆင်ထားသည့် သူ့လူများက ရှမ်းဝတ်စုံနှင့် လူ ၂၀ ခန့်အား ဝါးလုံးများကို ပခုံးပေါ် တင်ကာ လက်နှင့်တွဲချီလျက် ဝင်လာကြသည်။
"ဟေ့.. ကြိုးတုပ်တဲ့ပုံက အဆန်းပါလား"
ကင်းစင်ပေါ်မှ တစ်ဦးက လှမ်းပြောရာ မြင်းပေါ်မှ မြန်မာစစ်သည် ဝတ်စုံနှင့် ရှမ်းက
"သူတို့က ငါတို့ကို ဖမ်းလာတာကွ၊ ဒီမှာကြည့်"
ဆိုကာ ဇက်ကြိုးနှင့် တွဲချည်ထားသော လက်နှစ်ဖက်ကို မြှောက်ပြလိုက်သည်။
"ဟာ"
ရှေ့မှ တန်းစီဝင်လာကြပြီး တုတ်ရှည်များ ထမ်းထားကြသည့် လက်ျာဘီလူး၏ လူများက အယောင်ပြ ချည်ထားသော ကြိုးများကို ပစ်ချလိုက်ကြပြီး တုတ်ရှည်များ ဆွဲကိုင်လိုက်ကြရာ သူတို့အနောက်မှ မြင်းများလည်း ဟီလိုက်ကြ၏ ။ မြန်မာမြင်းများ၏ နောက်မှ ပါလာသူ ရှမ်းများမှာ လက်နှစ်ဖက်ကို ကြိုးဖြင့် ပူးချည်ခံထားရသလို မြင်းများကိုလည်း နှစ်စီးတွဲ ချည်ထားသောကြောင့် အလွယ်တကူ မပြေးသာ။
ရှမ်းဝတ်စုံဝတ် မြန်မာများနှင့် မြန်မာဝတ်စုံဝတ် ရှမ်းများ ရွာအဝင်ထိပ်၌ ရင်ဆိုင်မိကြစဥ် ရွာအတွင်းမှ လက်နက်ကိုင်များလည်း ပြေးလွှားရောက်ရှိလာကြသည်။ မြန်မာ ၁၈ ဦးအား ရှမ်း ၃၀၀ ခန့် ဝိုင်းပတ်မိသွားသည်တွင် အိမ်အမြင့်ထက်မှ ကြည့်နေသော ခွန်လောင်က ရယ်လိုက်ပြီး
"ကျုပ်အယောင်ဆောင်တဲ့ မြန်မာဗိုလ် ဘယ့်နှယ့်ရှိစ၊ ဒီလူမျှနဲ့ ကျုပ်ကို ဖမ်းဦးမတဲ့လား"
ရှမ်းမင်းသားဟန် ပေါက်နေသူ လက်ျာဘီလူးကလည်း မခိုးမခန့် ပြုံးလိုက်ကာ
"ခင်ဗျားက ရှမ်းမင်းသား လား၊ သည်ရွာက ခေါင်းဆောင်လား"
ဟု ပြန်မေးသည်။
"ကျုပ် စော်ဘွား ခွန်လောင်ပဲ။ အများကတော့ ရှမ်းမင်းသား လို့ ခေါ်ကြတယ်"
"အို.. တွေ့ရတာ ဝမ်းသာလိုက်တာဗျာ။ အဝေးကြီး မရှာရဘဲ ဒီမှာ ဆိုက်ဆိုက်မြိုက်မြိုက် လာဆုံနေတော့ ကျုပ်တို့ လိုက်ရ သက်သာတာပ"
"ဟားဟား၊ လေကြီးသည့် မြန်မာဗိုလ်ငယ်.. သင် ယခု အဝိုင်းခံထားရတာတောင် သည်စကား ပြောဝံ့သေးသလား"
"ခင်ဗျား ကျွန်တော့်ကို ဝိုင်းရုံ ဝိုင်းမိတာပါ၊ လက်ရ မဖမ်းမိသေးပါဘူး။ ခင်ဗျားလူတွေ အများကြီးတော့ ကျုပ်တို့သခင် မင်းထင်နော်ရထာဆီ ရောက်သွားကြပြီလေ။ အဖမ်းခံရတောင် တန်ပါတယ်"
ခွန်လောင် ဒေါသထွက်သွားသကဲ့သို့ အနည်းငယ်လည်း တွေဝေသွားသည်။ သည် လူနှစ်ကျိပ်မျှကို ကွပ်မျက်လည်း အကြောင်းမထူး၊ သူ့လူပေါင်းများစွာ မြန်မာတပ်သို့ ရောက်သွားခြင်းမှာမူ သူ့အကြံအစည်ကို များစွာနှောင့်နှေးစေနိုင်လေသည်။
"မင်းအမည် ဘယ်လိုခေါ်သလဲ၊ ဗိုလ်လား"
"တပ်မှူးပါ၊ လက်ျာဘီလူး လို့ ခေါ်ပါတယ်"
မည်သူမျှ မကြားဖူးကြသည့် အမည်။
"မင်းထင်နော်ရထာ ဆိုတာကရော ဘာလဲ"
"အရှေ့ဝင်းတော်မှူး ဗိုလ်မှူးတစ်ဦး ဖြစ်ပါတယ်"
"ငါ့လူတွေကို သူ့ဆီ မင်းပို့လိုက်တာလား"
"ဟုတ်တယ်"
"ဒါဆို မင်းကို ကျုပ် သတ်ရလိမ့်မယ်"
"မိရင် သတ်လေ၊ ကျွန်တော် မရှိရင် ရှမ်းတွေကိုလည်း ကွပ်လိုက်ဖို့ မှာထားပါတယ်။ ခင်ဗျားကို အားပေးထောက်ခံတဲ့ ရွာတွေကိုရောပေါ့"
"ဘာ"
"သြော်.. စော်ဘွားလေးက ကျွန်တော် ဒီလူအင်အားလောက်နဲ့ ရှမ်းနယ်ထဲ ဝင်လာတယ် ထင်လို့လား၊ နောက်ပြီး ရှမ်းမင်းသားကို သည်လူတွေနဲ့ လိုက်ဖမ်းမယ် ထင်နေတာလား"
"ဒါဆို မင်းတို့ ဘာလုပ်ဖို့ လာတာလဲ"
"ခင်ဗျားဆီမှာ ကျုပ်လူတစ်ယောက် ရှိတယ်ကြားတယ်၊ သူ့ကို လာရှာတာ"
"ငသူရိန် ဆိုတဲ့သူလား"
"ဟုတ်တယ်"
"ညကပဲ သူ့ကို မေးဖို့ အခေါ်လွှတ်တာကို ကွပ်တော့မယ် ထင်ပြီး တိုက်ခိုက် ထွက်ပြေးသွားတယ်။ ဘယ်လို လွတ်သွားသလဲတော့ မသိဘူး။ တပ်ကို ကျော်ပြေးသွားလေရဲ့။ လိုက်တာလည်း ပြန်မရသေးဘူး"
"သူရိန် လွတ်သွားပြီ ဆိုရင်တော့ ခင်ဗျားကို ဖမ်းဖို့ပဲ လုပ်ရတော့မှာပဲပေါ့"
"မင်းအရင် အဖမ်းခံရမယ်၊ မင်းပြောတာတွေကိုလည်း ငါမယုံဘူး။ ဟေ့.. ဝိုင်းဖမ်းကြကွာ"
ရှမ်းမင်းသား အမိန့်ပေးလိုက်လျင် လက်ျာဘီလူးနှင့် တပ်သား ၁၇ ယောက်အား ဝိုင်းထားကြသည့် ရှမ်းများက ညာသံပေးကာ တိုးဝင်လာကြသည်။ သို့ရာတွင် ရှည်လျားသော တင်ကျည်းဝါးတုတ်များ၏ မာကျောမှုကို သူတို့ဓားများ မတိုးနိုင်ကြဘဲ တုတ်ရှည်များကသာ သူတို့ထံ ထိခိုက်မိကြ၏ ။
ဘီလူးတပ်သားများသည် တစ်စုတည်း ညီညီညာညာ ခုခံကာကွယ်နေကြရာ တစ်ဦးတစ်ယောက်မျှ သူတို့အတွင်း မဝင်နိုင်၊ မဖြိုခွဲနိုင်ဘဲ အစုလိုက် လှုပ်ရှားသွားရာနောက်သို့သာ ဝိုင်းလိုက်နေကြလေသည်။ မြန်မာတို့ မြင်းများကို ရရှိကာ ထွက်ပြေးသွားမည် စိုးသဖြင့် ခွန်လောင်က
"သူတို့မြင်းတွေကို သတ်ပစ်ဟေ့.. မပြေးစေနဲ့"
"ရပ်စမ်း"
ခွန်လောင်ထက် ကျယ်လောင်သော အမိန့်ပေးသံနှင့် လက်ျာဘီလူးက အော်ဟစ်ကာ မြင်းများဘက် လှည့်သွားကြသော ရှမ်းများထံ ပြေးဝင်သွားသည်။ သူ့တပ်သားများလည်း အစုကွဲသွားပြီး ပြေးလိုက်ကြ၏ ။ လက်ျာဘီလူးက မြင်းအနားမှ လူ လေးငါးဦးအား အဆက်မပြတ် ရိုက်ချလိုက်ပြီး
"မြင်းတွေကို မထိနဲ့"
ဆိုကာ အစုပျက်လျက် တကွဲတပြားစီ ပြေးလာသည့် တပ်သားများကို ကြည့်ရင်း
"ငါတို့ လက်နက်ချတယ်။ မြင်းတွေကိုလည်း မသတ်ရဘူး၊ လက်နက်ချတဲ့ ငါ့လူတွေကိုလည်း မသတ်ရဘူး"
ရှမ်းမင်းသားက မိန့်မိန့်ပြုံး၍ အထဲဝင်သွားသည်။ လက်ျာဘီလူးက တုတ်ကို မြေပေါ် စိုက်လိုက်စဥ်
"ဟေး"
တပ်ရိုးပေါ်မှ ပေါ်လာသည်က ငသူရိန်နှင့် မုဆိုး ငသင်။ ငသင်အား နောက်ကြောင်းပြန်ရန် လွှတ်လိုက်သော်လည်း ငသူရိန်နှင့် တွေ့ကာ ပြန်လိုက်လာခြင်း ဖြစ်သည်။ သူတို့နှစ်ဦးက ရွာထဲသို့ ခုန်ချလာပြီး နီးရာလူများကို တိုက်ခိုက်ရင်း လက်ျာဘီလူးတို့ထံ လာနေ၏ ။ ရှေ့မှ ငသူရိန်နှင့် ရင်ဆိုင်မိသမျှ လဲပြိုကုန်ပြီး နောက်မှ ငသင်ကလည်း လိုက်လာသူများကို ဓားယမ်းလျက် ကာကွယ်လာသည်။
ဓားလှံများဖြင့် ချိန်ထားခံရသည့် လက်ျာဘီလူးသည် သူ့လူနှစ်ယောက်အား
ရပ်ကြည့်နေ၏ ။ ရှမ်းမင်းသားသည်ပင် ပြန်ထွက်လာပြီး ကြည့်နေပြီ။ သူ့ဘေး၌ လူနှစ်ဦးက သေနတ်များကိုင်ကာ ချိန်ထားကြသည်။ လက်ျာဘီလူးသည် လွတ်သွားပြီးမှ ပြန်ဝင်လာသည့် ငသူရိန်အား မိုက်သည်ဟု မဆို။ အဘယ်ကြောင့် ဝင်လာသည်ကို သိသကဲ့သို့ အပြစ်တင်ခြင်းသည် အချည်းနှီးဖြစ်ကြောင်းလည်း နားလည်၏ ။
"ငသူရိန်ရေ.. မင်း ပြန်လာကယ်ပေမယ့် တို့များ လက်နက်ချပြီးပါကောကွဲ့"
"ချစရာ မလိုဘူး တပ်မှူး၊ ကျွန်တော်တို့ ရအောင် ထွက်နိုင်တယ်"
"သူတို့က လူမထွက်သာအောင် မြင်းတွေကို ပစ်မလို့ ကြံနေတာ၊ ငါတို့လွတ်နိုင်ပေမယ့် မြင်းတွေကိုတော့ အသေမခံနိုင်ဘူး"
"မြင်းတွေ မထိအောင် တပ်မှူး စွမ်းဆောင်နိုင်မှာပါ"
"မရတော့ဘူး သူရိန်၊ သူတို့ အညှာသိသွားကြပြီ။ မြင်းတွေကိုပဲ ချိန်ပစ်ကြတော့မှာ"
လက်ျာဘီလူးက သေနတ်ဖြင့် ချိန်ထားကြသူများကို မေးငေါ့ပြကာ ပြောရာ လူအုပ်ကြားမှ သူရိန်မှာ ဆက်မတိုက်တော့ဘဲ ရပ်နေသည်။ ထိုအခါ ရှမ်းတစ်ဦးက မှိန်းဖြင့် ဝင်ထိုးမည် ကြံရွယ်ရာ ငသူရိန် ဓားကို ချလျက် အသင့်စောင့်နေလိုက်၏ ။ ရှမ်းမင်းသားက
"ဟေ့.. မတိုက်တော့တဲ့သူကို မလုပ်ရဘူး ဆိုတာ နားမလည်ဘူးလား"
ဟု လှမ်းအော်မှ မှိန်းကိုင်လူ တန့်သွားသည်။ ဆက်ဝင်လာလျင် သူသာ အသက်ပျောက်မည်ကို သိဟန်မတူ။ ရှမ်းမင်းသား အောက်သို့ ဆင်းလာပြီး လက်ျာဘီလူးရှေ့ ရပ်၍
"မင်းဟာ အင်မတန် ရဲရင့်ပုံ ပေါ်တယ်။ မင်းကို အခု ငါတို့ ဖမ်းဆီးထားပြီး တို့လူတွေနဲ့ လဲသင့် လဲရလိမ့်မယ်။ မင်းရဲ့ သခင်ဆီ ငါတောင်းဆိုတာတွေ မရဘူးဆိုရင်တော့ သည်လူအားလုံး သေလူချည်း"
"လူချင်း လဲချင်ရင်တော့ ကျွန်တော်တို့ကို အကျဥ်းသားလို မထားဘဲ သံတမန် မိတ်ဆွေများလို ဆက်ဆံပါမှ မင်းကြီး မင်းထင်နော်ရထာက လက်ခံပါလိမ့်မယ်။ ညှင်းပန်းနှိပ်စက် အကျဥ်းထားတယ် ကြားရင် သူ့လက်ထဲ ရောက်မိသမျှကို သတ်ညှစ်မယ့်သူပါ။ ကျွန်တော်တို့ကို ကွပ်လိုက်ပြီ ကြားလျင်လည်း ရှမ်းရွာအတော်များများ မီးလောင်တိုက်သွင်းခံရဖို့ မြင်ပါတယ်"
"မင်းပြောတာကို ငါမယုံဘူး"
"ဒီတပ်မှာ အခြားရွာတွေက မြန်မာတပ်နဲ့ ကြုံဖူးသူတွေ ရှိရင် မေးကြည့်ပါ"
ခွန်လောင်က ချက်ချင်း လူ လေးငါးဦးခန့် ခေါ်မေးသည်။ မြန်မာတပ်များက ခြိမ်းခြောက်ကြပုံ၊ ရွာများကိုတော့ မထိပါးသေးဘဲ လွှတ်ပေးထားပုံ၊ သူပုန်ဟု ယူဆလျင် ရွာပျက်မည်ဟု ယုံရပုံတို့အပြင် မြန်မာတပ်များစွာ ရွာအနှံ့ ရောက်ရှိ ဖြတ်သန်းလာနေကြကြောင်း ခွန်လောင် သိသွား၏ ။
"ဟေ့.. တပ်မှူးငယ်၊ မင်းတို့သခင် ဒီကို လိုက်လာနေသလား။ ဘယ်ရောက်နေပြီလဲ"
"နောက်ဆုံးသိရတာတော့ သည်ကနေ ၅ စခန်းခန့်အကွာမှာ တပ်ချနေတာပါ။ ကျွန်တော့်ဆီက အကြောင်းကြားတာ ရရင် လိုက်လာပါလိမ့်မယ်။ အကြောင်းမကြားနိုင်ဘဲ ပျောက်သွားရင်တော့.."
"တော်ပြီ၊ ငါသိတယ်။ မင်းတို့အားလုံးကို အိမ်ကြီးတစ်လုံးမှာ အစောင့်အကြပ် များစွာနဲ့ ပိတ်ထားရလိမ့်မယ်။ မင်းအရှင် ငါချိန်းတဲ့နေရာကို လာဖို့ ချက်ချင်း အကြောင်းကြားပေးပါ။ သူတို့ကို သေချာ ခေါ်သွားစမ်း၊ လုံးဝ မလွတ်စေနဲ့တော့။ လူတွေနဲ့ မြင်းတွေကို ခွဲထား။ ပေါ့လျော့လျင် သေဒဏ်"
တစ်လက်စတည်း အခြားသူများကိုပါ အမိန့်ပေးလိုက်သည်။
"မြန်မာတပ်တွေရဲ့ အင်အားကို ခံနိုင်အောင် မနက်ဖြန် နံနက်စောစောက စပြီး သစ်ဝါးရှာ တပ်ကြီး တည်ကြရမယ်။ ရှေ့ရံတပ်နှစ်ထပ် ကာပြီး သည်ရွာကို ခံတပ်အဖြစ် ခိုင်ခိုင်မာမာ တည်ရမယ်။ တစ်ရက် နှစ်ရက်အတွင်းမှာ အားလုံး ပြီးစီးကြစေ အိုက်ပုံတို့"
လက်ျာဘီလူးကတော့ သူ့လူများကို အသာတကြည် အဖမ်းခံရန်နှင့် ငြိမ်ဝပ်စွာ နေကြရန် ဆိုလျက် ရှေ့ဆုံးမှ ခေါ်ရာလိုက်သွားသည်။ ရှမ်းတို့သည် အခြားသူများကို ကြိုးမတုပ်ဘဲ ငသူရိန်တစ်ဦးတည်းကိုသာ ကြိုးတုပ်လျက် အနောက်ဆုံးမှ ဆွဲခေါ်လာသည်။ ထို့နောက် ကျယ်ဝန်းသော အိမ်တစ်လုံးပေါ်မှ အိမ်ရှင်များအား ဆင်းစေပြီး မြန်မာစစ်သည်များကို အလုံပိတ် ထည့်သွင်းထားလိုက်လေတော့သည်။
(ဆက်ရန်..) ရှမ်းမင်းသား (၆)
Written by သင်္ခရာဇာ
End date: April 11, 2022
No comments:
Post a Comment