ရှမ်းမင်းသား (၄)

        တောတွင်းတစ်နေရာရှိ အဖြူရောင် အုတ် ကျောက်တို့ဖြင့် တည်ဆောက်ထားသော ရှမ်းမင်းသား၏ နန်းတော်ကြီး ထီးထီးမားမား တည်နေရာ။ ကြီးမားလှသော ကညင်ဆီမီးတိုင်များစွာ၏ အရောင်ကြောင့် ထိန်ထိန်ညီးလျက် ရှိသည့် ဧည့်ခန်းဆောင်၏ သလွန်ထက်ဝယ် ရှမ်းမင်းသားနှင့် ကြင်ယာတော် မင်းသမီးနှစ်ပါးတို့ စံစားနေခိုက် သူ၏ လူယုံကြီး ဝင်လာပြီး တစ်စုံတစ်ရာ လျှောက်တင်၏ ။

ရှမ်းမင်းသားသည် ကြားလိုက်ရသော သတင်းကြောင့် ဆတ်ခနဲ ထ ထိုင်လိုက်မိသည်။

"ဘာ၊ ဗမာနေပြည်တော်က လာတာ၊ ဟုတ်လား။ ဒါ အန္တရာယ်ရှိနိုင်တဲ့ အ​နေအထားပဲ။ မင်းတို့ကြားတဲ့သတင်း ခိုင်မာရဲ့လား။ သက်သေ ပြစရာ ပါလား"

လူယုံကြီးက လျှောက်၏ ။

"ပါလာပါတယ်။ မြန်မာတပ်သားတစ်ဦးကို ဖမ်းမိလာပါတယ်။ လေးဦးလိုက်ဖမ်းရာမှာ သူတစ်ယောက်သာ ဖမ်းမိလာခဲ့တယ် ဆိုပါတယ်။ သူတို့တွေက ရှမ်းမင်းသားသတင်း လိုက်မေးနေကြတယ် တဲ့"

"သြ.. သြ၊ တယ် အနံ့ခံကောင်းတဲ့ သူတွေပါလား။ ကောင်းပြီလေ၊ အဲဒီ သုံ့ပန်းကို ရွာ (၃) မှာထား။ မနက်ဖြန် နံနက် ငါတို့ ခရီးထွက်မယ်။ သူတို့ကို ဦးအောင် ရှာဖွေ ဖမ်းဆီးရလိမ့်မယ်။ မဖမ်းနိုင်လို့ ဒီထိ ရောက်လာရင် အရေးခက်လိမ့်မယ် အိုက်ပုံ"

လူယုံကြီးက အရိုအသေပေး၍ ထွက်သွားပြီး စော်ဘွားလေး ခွန်လောင်သည် တစ်စုံတစ်ရာကို လေးနက်စွာ တွေးတော ကျန်ရစ်လေသည်။ မိဖုရား နှစ်ပါးလည်း မင်းသား၏ အမူအရာ အပြောင်းအလဲကြောင့် မကပ်ရဲကြတော့ဘဲ မသိမသာ ထသွားကြရ၏ ။

"အိုက်ပုံ.. အိုက်ပုံ၊ လာစမ်း"

အပြင်မှ ရပ်စောင့်နေသူ လူတစ်ဦးကို မှာကြားနေသော လူယုံတော်ကြီး ပြန်လည် ပြေးဝင်လာ၏ ။ မင်းသားက

"ငါတို့ လူတွေ အားလုံးဆီ အကြောင်းကြားထားလိုက်။ လိုအပ်လို့ ငါခေါ်တာနဲ့ ချက်ချင်း လာနိုင်အောင် ပြင်ထားကြစေ။ ရွာတိုင်းက ငါတို့လူတွေ တစ်ရွာကို တစ်ကျိပ်စီ နက်ဖြန် ရွာ (၃) မှာ ဆုံကြရမယ်လို့ အမိန့်တော်ပြန်လိုက်စမ်း"

"မှန်ပါ၊ အရှင့်အလိုတော်အတိုင်း ဖြစ်စေရပါမယ်"

ခွန်လောင် အသေအချာ စဥ်းစားရပြီ။ ဤအရေးသည် သာမန်မဟုတ်၊ သူ့၌ အန္တရာယ်ကျရောက်လာနိုင်သည့် အရေးမျိုး ဖြစ်သည်။ မိမိ၏ အကြံအစည်များ အထမမြောက်သေးမီ မြန်မာတို့ မည်သည့်သတင်း သဲလွန်စမှ ရသွား၍မဖြစ်။ ထို့ကြောင့် လိုအပ်သည်တို့ကို မိမိကိုယ်တိုင် ဆောင်ရွက်တော့မည်ဟု ဆုံးဖြတ်ချက် ချလိုက်လေသည်။

ထိုအချိန်တွင် လက်ျာဘီလူးသည် ရှမ်းမင်းသား၏ သစ္စာတော်ခံများအား ဖမ်းဆီးထားမိသည့်အလျောက် အမျိုးမျိုး စစ်ဆေးမေးမြန်းလျက် ရှိ၏ ။ သို့သော် သူတို့ကိုယ်တိုင်လည်း ရှမ်းမင်းသားကို တစ်ကြိမ်သာ တွေ့ဖူးကြရုံမက အမည်နာမလောက်သာ သိရှိကြကာ နေရပ် အစီအစဥ်တို့ကိုမူ မည်သူမျှ မသိကြကြောင်း ထွက်ဆိုနေကြလေသည်။

သူတို့ အမြင့်ဆုံး သိထားသည်မှာ အိုက်ပုံ ဆိုသည့် လက်ရုံးတော်ကြီး တစ်ဦးနှင့် ဆက်သွယ်နိုင်မည့် ရွာတစ်ရွာ ဖြစ်၏ ။ ပန်းလောင်ရွာ ဟူသော တောင်များဝိုင်းလျက် ချောင်ကျသည့် ရွာတစ်ရွာတွင် လက်ရုံးတော်ကြီး၏ အထောက်တော်များ ရှိနေကြပြီး ရှမ်းမင်းသားနှင့် ထိုနေရာတွင် အဆက်အသွယ် ပြုလုပ်ရကြောင်း၊ အမိန့် ညွှန်ကြားချက်များကို အိုက်ပုံနှင့် အထောက်တော်များက ယူလာလေ့ရှိကြောင်း တညီတညွတ်တည်း ဆိုသည်။

ထို့ကြောင့် လက်ျာဘီလူးနှင့် လူ ၂၀ သည် ပန်းလောင်ရွာရှိရာအရပ်သို့ ခရီးဆန့်ခဲ့ရပြန်၏ ။ ပန်းလောင်သို့ မရောက်မီ နှစ်စခန်း၌ ရွာကြီးတစ်ရွာသို့ ဝင်ရောက်တည်းခိုနေကြလေသည်။ တစ်ရက်လုံးလုံး စီစဥ်စရာ ရှိသည်တို့ကို စီစဥ်ပြီးသောအခါ နောက်တစ်နေ့နံနက်၌ ပန်းလောင်သို့ ဆက်လက် ထွက်ခွာရန် ပြင်ဆင်ကြရ၏ ။

သို့သော် သူတို့အားလုံး ပြောင်းလဲခဲ့ကြပြီ။ ရှမ်းအဝတ်အစား ဆောင်ဓားတို့မှစ၍ အားလုံး ဆင်ယင်ကြရသည့်အပြင် မြင်းများကိုပင် ရှမ်းမြင်းတို့ က သည့်အတိုင်း ကုန်းနှီးပဝါ တင်ကြရသည်။ တပ်သားများ ပြင်ဆင်ပြီးသောအခါ ရွာလူကြီးအိမ်ထက်မှ လက်ျာဘီလူး ပေါ်လာလေ၏ ။

သူ့လူများသည် ထွက်လာသူမှာ တပ်မှူးမှန်း သိကြသော်လည်း များစွာ အံ့သြကြကုန်သည်။ လက်ျာဘီလူးသည် ရှမ်းစော်ဘွားတစ်ဦးကဲ့သို့ ဝတ်ဆင်ထားပြီး ဓားကိုပင် ရွှေဇဝါအကွပ်တပ် ရှမ်းဓားနက် ကိုင်စွဲထားသည်။ ခေါင်းပေါင်းဖြူ၊ တိုက်ပုံဖြူလွလွ၊ ရှမ်းဘောင်းဘီအနီတွင် ရွှေကြိုးနှင့် ဖြစ်ရာ အလွန်ခန့်ညားသပ်ရပ် ကြည့်​ကောင်းနေသည်။

လူပုံကလည်း နှုတ်ခမ်းမွေးစစနှင့် ခန့်ခန့်ချောချောဟန် ပေါက်နေ၏ ။ ပြုံးထေ့ထေ့ အမူအရာကိုက တကယ့်စော်ဘွားငယ်တစ်ဦးအတိုင်း ဖြစ်ရာ တပ်သားများက အိမ်အောက်မှ သြဘာပေးလိုက်ကြသည်။ ရွာသူရွာသားများလည်း ငေးမောနေကြလေသည်။

ထိုပုံစံအတိုင်း မြင်းကို လေးဘက်ကျ စီးလျက် တောထဲသို့ လှလှပပ ဝင်သွားကြ၏ ။ တောင်များကို စီတန်းသွားလာ ကျော်ဖြတ်ခဲ့ပြီး ယင်းတစ်ည တောထဲ၌ပင် စတည်းချကြသည်။ နောက်တစ်နေ့ နေမဝင်မီ ပန်းလောင်သို့ ရောက်ကြရာ ရှမ်းမင်းသား ကိုယ်တော်တိုင် ကြွချီလာသည် ဟူသော သတင်းမှာ ရွာထဲ ရုတ်ချည်းပျံ့နှံ့သွားလေသည်။

အကြီးအကဲ တစ်ဦးက ပြေးလာကာ မြင်းရှေ့ လက်အုပ်ချီလျက်

"စော်ဘွားလေး မိန့်မှာတော်မူလိုက်တဲ့အတိုင်း ရွာက လူငယ် ၁၀ ဦးကို အသင့်ပြင်ပြီးပါပြီ။ နံနက်ပဲ အပို့လွှတ်တော့မလို့ပါဘုရား။ အရှင်နဲ့ တစ်ပါတည်း ခေါ်ဆောင်သွားမယ် ဆိုရင်လည်း အဆင်သင့်ပါဘုရား"

"အိမ်း၊ မပို့နဲ့ဦး.. နံနက်မှာ သူတို့ကို တခြားအရပ်ဆီ လွှတ်စရာရှိတယ်။ အသင့်ပြင်ထားလိုက်ပါ သူကြီးမင်း"

"ကောင်းပါပြီဘုရား"

စကားအသွားအလာအရ ထိုရွာမှ လူငယ် ၁၀ ယောက်အား တစ်နေရာသို့ ပို့လွှတ်သည် ဖြစ်လိမ့်မည်။ ထို့ကြောင့် လက်ျာဘီလူးက အခြားအရပ်သို့ နေရာလွှဲကာ သွားရောက်စေပြီး ရှမ်းမင်းသား၏ အကြံအစည်အချို့ နှောင့်နှေးစေရန်နှင့် အင်အား ယုတ်လျော့စေရန် ကြံလိုက်၏ ။

သူတို့အဖို့ ကံကောင်းသည်မှာ ပန်းလောင်သို့ ရှမ်းမင်းသားကိုယ်တိုင် တစ်ကြိမ်မျှ မလာဖူး ဟု သိရသည်။ မနေ့က ရှမ်းမင်းသား၏ လက်ရုံးတော်ကြီး လာသွားကြောင်းလည်း ကြားရ၏ ။ လက်ျာဘီလူးက တပ်သားအချို့နှင့် စုံစမ်းခိုင်းရာ အိုက်ပုံ မည်သည့်အရပ်မှ လာ၍ မည်သည့်ဘက်သို့ ထွက်သွားကြောင်းများ သိခဲ့ရသည်။

ရောင်နီလာသည်နှင့် ရွာမှ လူငယ်များအား သူတို့ လာခဲ့ကြသည့် အရပ်ဆီသို့ စေလွှတ်လိုက်ပြီး လက်ျာဘီလူးတို့လူစုက အိုက်ပုံ လာခဲ့သည်ဆိုသော အရပ်ဘက်သို့ ထွက်ခဲ့ကြသည်။ ရွာတစ်ရွာ တွေ့တိုင်း ဦးစွာ စနည်းနာပြီးမှ ရှမ်းမင်းသား မရောက်ဖူးသေးသော ရွာဖြစ်လျင် ဟန်ဆောင်၍ ဝင်သည်။ ရောက်ခဲ့ဖူးကြောင်း ကြားသိရသော် မဝင်ဘဲ လူရိပ်လူယောင်သာ ပြကာ အမိန့်ထုတ်၍ သူ့အကြံကို အကောင်အထည် ဖော်နေလေ၏ ။

ထိုအချိန်တွင် ရှမ်းမင်းသားသည် သူ၏ ဟော်နန်းတော်မှ ရွာ (၃) ဟု လျှို့ဝှက်သတ်မှတ်ထားသော အရပ်သို့ ထွက်လာသည်။ လမ်းတစ်လျှောက် ၌ ရှမ်းမင်းသားကိုယ်တော် ထွက်ချီလာပြီ၊ စစ်ရေးအစီအစဥ်များ ပြင်ဆင်နေပြီ ဟူသော သတင်းများကို ကြားနေရသောအခါ အံ့သြမိ၏ ။ မိမိက ယခုမှ ကြွလာခြင်း ဖြစ်သော်လည်း တစ်စုံတစ်ယောက်သည် မိမိအယောင် ဆောင်ကာ လှည့်လည်သွားလာနေလေပြီ။

ရွာ (၃) သို့ ရောက်သောအခါ သူ၏ အစီအစဥ်များလည်း ကမောက်ကမ ဖြစ်လျက်ရှိသည်ကို တွေ့ရသည်။ လိုအပ်သည့် အင်အားစု ရှိမနေ၊ လူများ ပြန့်ကျဲနေပြီး တစ်ယောက်တစ်ပေါက် ဖြစ်နေကြသည်။ သတင်းမျိုးစုံလည်း ကြားနေရရာ မည်သည်က အမှန်ဟု မဆုံးဖြတ်နိုင်။ အချို့က ကျိုင်းတုံစော်ဘွားကြီးအား ဦးစွာ တိုက်လိမ့်မည်ဟု ဆိုနေကြသလို အချို့ကလည်း အုန်းဘောင်နယ်သို့ အလျင်သိမ်းမည်ဖြစ်ကြောင်း ငြင်းခုန်နေကြ၏ ။

ယင်းသတင်းများမှာ တစ်ခုမှ သူ၏ အကြံအစည်များ မဟုတ်၊ အချို့သည် ရန်တိုက်ပေးခြင်း ဖြစ်ပြီး အချို့သတင်းတို့မှာ ယုံမှားသင်္ကာ ရှိကြစေရန် ရည်ရွယ်ခြင်းဖြစ်ကြောင်း သဘောပေါက်မိသည်။ အဘယ့်ကြောင့် လူများစွာကို မိမိအယောင်ဆောင်ကာ ရွာတစ်ရွာသို့ စေလွှတ်နေမှန်းတော့ စဥ်းစားမရ။ အများစု ပြောဆိုနေကြသည်မှာလည်း အမှန်ပင် ထူးဆန်းနေလေသည်။

လက်ျာဘီလူးသည် လျှို့ဝှက်လွန်းသော ရှမ်းမင်းသား၏ နေရပ်ကို မည်သို့မျှ မသိနိုင်သဖြင့် ကျားကို တောမှ ထုတ်သည့်နည်း၊ ဆင်ကို အုပ်မှ သင်းခွဲ၍ ဖမ်းသည့်နည်းများကို သုံးကာ ရှမ်းမင်းသား ထွက်လာစေရန် ကြံစည်နေ၏ ။ ရုတ်တရက် သတင်းထူးတစ်ခုကို သူကြားရသည်။ မြန်မာတပ်မှူးတစ်ဦးသည် ရှမ်းနယ်ထဲသို့ ဝင်ကာ လုယက် ဖျက်ဆီးနေသည် ဆိုသည့် သတင်း။

သူတို့သည် အနက်ရောင် မိန်ညိုများ ဝတ်ဆင်ထားပြီး ဘီလူးပုံပါ မောက်တိုများလည်း ဆောင်းထားကြသည် ဟူ၏ ။ သူ၏ တပ်သားများပင်၊ အမိန့်မရဘဲ မည်သူ ဦးဆောင်၍ ထိုကဲ့သို့ ဝင်ရောက် ပြုကျင့်သည်ကို သိရန် လိုအပ်လာသည်။ သူ အခေါ်လွှတ်လိုက်သည့် တပ်များမှ ဦးစီးတစ်ယောက်ယောက်က သူ့စိတ်ကူးနှင့်သူ လုပ်နေလေသလား။

မြန်မာတပ်များ ဝင်လာ သောင်းကျန်းနေသည် ဆိုသော နေရာမှာ မြေပုံပေါ်တွင် သူတို့နှင့် ငါးစခန်းမျှသာ ကွာသည်။ စုံစမ်းရန် လွှတ်လိုက်သည့် တပ်သား နှစ်ယောက်မှာ ပြန်မလာ၊ နောက်တစ်ဦး ထပ်စေရာမှာလည်း ထိုနည်းအတိုင်း။ ထို့ကြောင့် လက်ျာဘီလူး ခေါင်းပူအောင် တွေးနေရပေပြီ။

တစ်ရက်တွင် မြန်မာတပ်သားများသည် ရွာငယ်လေးတစ်ရွာမှ ရိက္ခာစုဆောင်းရင်း မသယ်နိုင်သည့် စပါးကျီတစ်ခုကို မီးတိုက်လိုက်ကြသည်။ သူတို့၏ အကြောင်းပြချက်မှာ ရှမ်းမင်းသားအတွက် အထောက်အပံ့မရစေရန် ဖျက်ဆီးခဲ့ခြင်း ဖြစ်သည် ဆို၏ ။ အဆိုပါ လုပ်ရပ်ကြောင့် ရွာသားများမှာ ကျေနပ်မှု မရှိကြဘဲ မြန်မာတပ်သား ၅၀ ကျော်အား ဝိုင်းထားကြလေသည်။

လေး မြား ဓား လှံ ကိုင်စွဲထားကြသော မြန်မာတပ်သားတို့ကလည်း တုတ်ဓားဒူးလေး စသည်တို့ ကိုင်ဆောင်လာကြသည့် ရွာသားများအား ကြိမ်းမောင်းခြိမ်းခြောက်ကာ ထွက်သွားကြသည်။ သူတို့နှင့်အတူ ရှမ်းလူငယ်တစ်ဦးကို ကြိုးတိုပ်လျက် မြင်းနှင့် ဆွဲခေါ်သွားကြ၏ ။ သူတို့ ထွက်သွားပြီး ထမင်းတစ်အိုးချက်ခန့် အကြာ ရှမ်းမင်းသား၏ တပ်များ ရောက်လာကြလေသည်။

ထိုအခါ ရွာသူရွာသားများက ဝမ်းသာအားရ တိုင်တောကြ၏ ။ ရှမ်းမင်းသားကမူ တွေဝေစဥ်းစားနေပုံ ရသည်။ ခဏကြာမှ တပ်သားတစ်ဦးကို သီးသန့်ခေါ်ကာ နှစ်ယောက်တည်း တွေ့ဆုံလေသည်။

"သူတို့ ဘာပြောနေကြသလဲကွ ငစိုင်း"

"မြန်မာတပ်သားတွေ အများကြီး ဝင်ပြီး အနိုင်ကျင့်သွားလို့ လိုက်ပြီး တိုက်ခိုက်ဆုံးမပေးဖို့ တောင်းဆိုနေကြတာပါ။ သူတို့လည်း လိုက်ကြမယ် တဲ့"

"အင်း.. ခက်တော့ ခက်နေပြီ။ ကိုယ့်လူကိုယ် မှားတိုက်မိမှာလည်း စိုးနေရတယ်။ ဒါပေမယ့် ဒီကိစ္စကို အမြန်ဖြေရှင်းမှ သံသယ ကင်းတော့မယ်။ ဒီလိုလုပ်၊ မြန်မာတပ်တွေ သွားတဲ့ဘက်ကို မေးပြီး ငါတို့အလျင် မြင်းနဲ့ လိုက်ကြမယ်။ ရွာသားတွေကို နောက်က လိုက်ခဲ့ဖို့ ပြောခဲ့။ ငါကတော့ တို့လူတွေကို ကွပ်ကဲဟန်ပြုနေမယ်။ မင်းပဲ သူတို့ကို စီစဥ်လိုက်ကွာ"

"ကောင်းပါပြီ တပ်မှူး"

မြန်မာမြင်းသည်တို့နောက်သို့ ရှမ်းမြင်းသည်များ လိုက်သွားကြပြီး သူတို့နောက်မှ ရွာသားများ၏ မြင်းများ လူများစွာလည်း ထပ်လိုက်ကြပြန်သည်။ ရွာသားတို့သည် လမ်းခရီးတွင် သူတို့၏ ကြက်ဝက် ကျွဲနွားများ လွှတ်ပစ်ခဲ့သည်ကို အံ့သြစွာ မြင်ကြရ၏ ။ အချို့က မိမိတို့ တိရစ္ဆာန်များကို ဖမ်းဆီးကာ ရွာသို့ ပြန်ဆွဲခေါ်သွားကြသည်။  

(ဆက်ရန်..)  ရှမ်းမင်းသား (၅) 

Written by သင်္ခရာဇာ

End date: April 11, 2022