နန်းသိမ်းပွဲ (၅)

 သဘောထား နူးညံ့ ပျော့ပျောင်းသော ဝိရူဠှက နတ်မင်းသည် ဆိုးသွမ်းသည့် ဂုမ္ဘာန်များကို အုပ်ချုပ်ရသည့် အားလျော်စွာ မျက်နှာကို ရှုတင်းတင်း ထား၍ ကျူးကျော်သူများကို စောင့်စားနေ၏ ။ အရှေ့ဖျား ဝင်လာသည့် ချပ်ဝတ်နီနှင့် နတ်ဘီလူးသည် သူ၏ နန်းတော်ကြီးကို တုန်ခါလောက်အောင် ခြေလှမ်းပြင်းပြင်းဖြင့် နင်းဝင်လာရာ

"အလို.. ဒါက ဘယ်သူပါလိမ့်။ ငါ တစ်ကြိမ်မျှ မမြင်ဖူးသော တန်ခိုးကြီး နတ်ဘီလူးတစ်ပါးပါလား။ ကုဝေရရဲ့ အခြံအရံ ဣန္ဒာသောမတို့ နာမည်ကျော် တတ္ထလောလောတို့လည်း မဟုတ်ဘဲ စေတမင်း တဲ့။ ဒွတ္တဘောင်မင်း ဘုန်းကြီးလွန်းလို့ နင်းလိုက်တိုင်း မြေကျွံရတာကြောင့် သိကြားကတောင် သံမှိုတွေ လိုက်ခံပေးရတယ် ဆိုတဲ့ သူမျိုးပဲ။ ငါတို့ နေရပ်ဟာ သူတို့ရဲ့ မြောက်ပြင်လို မာကျောတဲ့ ကျောက်ဖြူသားအတိ မဟုတ်တော့ ငါ့နန်းတော် သဲကျောက်တွေ အက်ကွဲကုန်မှာ စိုးရတယ်"

ဟု မြင်၍ ပလ္လင်မှ ဆင်းလာပြီးလျင် ပြေးကြိုလေသည်။

"အမောင် မည်သူနည်း၊ အဘယ်ကြောင့် တောင်အရပ်ကို လှည့်လည်လာသနည်း"

နတ်မင်းက အလုံးစုံ သိမြင်ပြီး ဖြစ်ပါလျက် မေးရမည်ကို မေးလာသောအခါ စေတကလည်း ရှိခိုးရင်း

"အကျွန်ုပ်ကို နတ်မင်းကြီး သိမြင်ပြီး ဖြစ်ပါလိမ့်မည်။ အကြောင်းချင်းရာ အားလုံးနှင့်တကွ အပြစ်ပြုမိသည်များကို ဝန်ချ တောင်းပန်ပါ၏ ။ အရှင်နတ်မင်း ပေးအပ်မည့် ပြစ်ဒဏ်ကိုလည်း ကြည်ဖြူစွာ ခံယူရန် အသင့် ဖြစ်ပါသည်။ ကျွန်ုပ်အား ရင်မြှဖစ်သော သား၊ ဆိုဆုံးမရမည့် တပည့်၊ ဦးရီးတော်၏ တူ သဘောမျိုး မှတ်ယူလျက် အရှင်မင်းကြီး အလိုရှိသည့်အတိုင်း စီရင်ရန် အပ်ပါ၏"

ထိုသို့ ပွင့်လင်း ရင်းနှီးစွာ ဆိုလာသောအခါ နူးညံ့နှလုံးရှိသည့် နတ်မင်းမှာ ဤသို့ ဆင်ခြင်မိရသည်။

"ဤသူငယ်သည် အမှန် ဘုန်းတန်ခိုးကြီးသူ ဖြစ်၏ ။ မိမိကိုယ်ကိုယ် နှိမ့်ချတတ်သူလည်း ဖြစ်သည်။ မိမိအလိုရှိရာကို ကြံဆောင်နိုင်စွမ်းသည့် ယောက်ျားကောင်း အစွမ်းသတ္တိရှိ၏ ။

အပြစ်ကို ဝန်ခံနိုင်ခြင်း တည်းဟူသော ပညာရှိလက္ခဏာ နှင့် ပြည့်စုံသည်။ အရာခပ်သိမ်း အောင်မြင်နိုင်သည့် ဇိနမျိုးနွယ်ဝင်လည်း ဖြစ်၏ ။

ငါနှင့် ရင်းနှီးကျွမ်းဝင်လိုဟန်လည်း ရှိလေသည်။ စင်စစ် ငါက သူ့အား အပြစ်ပေးနိုင်လောက်သည့် သာလွန်ကြီးမြတ်မှု မရှိ၊ သင်း အရှိန်အဝါ ကြီးလွန်းသည်။ သူ၏ သခင်နှင့်ပင် အပ်ရတော့မည်"

ယင်းသို့ ကြံမိ၍

"ကိုင်း.. ငါလည်း မင့်အမည် အရည်အစွမ်းနှင့် အကြောင်းကိစ္စ လာရင်းကို သိပြီ။ မင့်ကို တူသားကဲ့သို့ မှတ်ယူပါသည်။ ငါ၏ အုပ်စိုးမှုမှ ဖီဆန်နေသူ ဒါနဝရက္ခိုသ်ကို မင်းက ဆုံးမခဲ့သည် ဖြစ်၍ ငါက တစ်ဖန် အပြစ်မပြုလို။ ဝေဿဝဏ်နတ်မင်းထံသို့သာ ပြန်၍ ဖြစ်ပျက်လုံးစုံကို တင်လေလော့။ နောင် အလိုရှိသော် ငါ့အား ဦးစွာ သိကြားပါစေ မင်းသား"

စေတက ဦးခိုက်လျက် အာမခံသည်။

"မလွှဲသာ၍ ပြုကျင့်မိသည်ကို သည်းခံတော်မူပေသော အရှင်နတ်မင်း၏ မြတ်သောနှလုံးကို ဦးထိပ်ပန်ဆင်လျက် အတုယူ ကျင့်သုံးပါမည်။ နောင် ဤကဲ့သို့အပြစ်များ မပြုတော့ပါဟု ကတိပြုပါ၏ ။ အရှင်နတ်မင်းအားလည်း ဘုရားတစ်ဆူကဲ့သို့ ရိုသေလေးမြတ်ပါမည့်အကြောင်း လျှောက်ထားအပ်ပါသည်ဘုရား"

"အိမ်း.. သာဓု၊ သာဓု.. သာဓု။ ကုဝေရထံ ငါ သဝဏ်လွှာ ရေးပါးလိုက်မည် မောင်မင်းငဲ့၊ ယခုနေရာ၌ ခေတ္တ စောင့်ပါ။ မည်သည့်အရပ်မှ မလှမ်းကြွပါနှင့်"

ဒီပနှင့် စေတတို့ ပြုံးမိကြသည်။ ဤနတ်ဘီလူးများ စိတ်ကို ဖတ်နိုင်သည်ကိုမူ မဆင်ခြင်မိသော ဝိရူဠှကသည် အဘယ်ကြောင့် ပြုံးသည်ကို ဂရုမပြုဘဲ အမှာတော်ရေးအား ဆင့်ခေါ်လိုက်သည်။ နတ်မင်း အပါး၌ မရှိလျင် ဒီပက ခပ်တိုးတိုးဖြင့်

"အပြန်ကျ မင်းနဲ့ငါ ပြိုင်တူ ခြေချမယ်"

ဟု ကပ်ပြောသည်။ နားစွင့်နေသော

ဂုမ္ဘာန်စစ်သူကြီးလည်း ကြားသွားပြီး သူ့လူများကို တိုးတိတ်စွာ မှာ၏ ။

"ဟို နတ်ဘီလူးမင်းနဲ့ သူ့အစ်ကိုတော်တို့ ခြေကို အပြိုင်နင်းပြီး ပြန်ကြလိမ့်မယ်။ သည်အခါ ငါတို့ကလည်း အားကျမခံပါစေနဲ့၊ သူတို့နဲ့အပြိုင် တစ်ထပ်တည်း ခြေကိုချလျက် ချီပို့ကြရမယ် မင်းကြီးတို့"

သူ၏ နောက်တော်ပါး စစ်ကဲ တပ်မှူးများက တစ်ဆင့်စကားဖြင့် သယ်ဆောင်သွားရာ တစ်တပ်လုံး ပျံ့သွားပြီ။ ဝိရူဠှက နတ်မင်းက စီရင်ပြီးစီးသော သဝဏ်လွှာကို အပ်၍ နှုတ်ဆက်သောအခါ စေတက သဘောမတူသော်လည်း ဒီပသည် စေတနှင့် ထပ်တူ ကြမ်းကို ခပ်ပြင်းပြင်း နင်းလေသည်။

ဂုမ္ဘာန်စစ်သည်များကလည်း သူတို့နှင့် တစ်ပြိုင်တည်း ခြေနင်းလျက် လိုက်ပါ ပို့ဆောင်ကြ၏ ။ ထိုအခါ နတ်ဘီလူးတို့သည်လည်း အတူ ပြုကုန်သည် ဖြစ်ရာ နန်းတော်တစ်ခွင်လုံး ခြိမ်ြ့ိမ့်အုန်းအုန်း ရှိလေသည်။

"ဟဲ့.. ဟဲ့.. ဘယ်လို ဖြစ်ကြတာတုန်း"

နတ်မင်းကြီး၏ ရေရွတ်သံကား ခြေနင်းချသံ တဝုန်းဝုန်းကြားတွင် ပျောက်ဆုံးသွားလေသည်။ နတ်ဘီလူးတပ် ထွက်သွားသောအခါ တောင်ပြင်နန်းတော်၏ ကြမ်းပြင်များ အက်ကွဲကျန်ရစ်ပြီး နန်းတော်တိုင် တစ်လုံးလည်း ပြိုသော ဟူ၏ ။

.........x.........x.........x..........x..........

အခန်း (၈)

"မောင်မင်း ကိုယ့်အပြစ်ကိုယ် သိရဲ့လား"

"သိပါသည် အရှင်"

"မိဖုရားအတွက်နှင့် သိကြားမင်း အသူရာပြည် ချီ၍ လုပ်ကြံသည့် ထုံးကို နှလုံးမူလေသလား စေတမင်း"

"မဟုတ်ပါဘုရား၊ မိမိသဘောဖြင့်သာ လုပ်ဆောင်ခဲ့ခြင်း ဖြစ်ပါသည်"

"ငါက ဒီပကို သူရဲကျော်ဟူ၍ ချီးမြှောက်ထားသည်မှာ ဤသို့ ဖောက်လွှဲဖောက်ပြန် ပြုရန် သဘာသက်ရောက်သလား"

ဒီပ ဖြေရသည်။

"ဘုန်းကြီးသည့် အရှင်ကြောင့် မဟုတ်ပါ။ ကျွန်တော်များ ဆိုးသွမ်းမှုသည် ဗီဇကြောင့်သာ ဖြစ်ပါသည်။ မိမိအပြစ်သာ ဖြစ်ကြောင်းပါ"

"သောဏ စစ်သူကြီး၊ ငါက သင့်ဘုန်းလက်ရုံးကို ယုံ၍ ယုဂန္ဓိုရ်တောင်အား အပ်သည်မှာ ဤသို့ ကျေးဇူးမစောင့် သူမိုက်များနှင့် ပေါင်းကာ ကျူးကျော်ရန်စရန်ဟု သင် ထင်မြင်လေသလော"

"ကျွန်တော်မျိုး လျှောက်တင်ဝံ့သည်မှာ ကျွန်ုပ်သည် မုချ ငရဲသို့ သွားရမည့်သူ ဖြစ်ပါလျက် ဤသူများ၏ အထောက်အပံ့ကြောင့်သာ နတ်ဘီလူးဘဝကို ရရှိလာခြင်း ဖြစ်ပါသည်။ မိမိ မိတ်ဆွေဖော်မွန်တို့ အလိုရှိသည့်အခါ ဦးခေါင်းကို ဖြတ်၍ ပေးသော်လည်း ပေးရာ၏ ။ အရှင်အား ဆန့်ကျင် လွန်ကျူးသည့်အမှု မဟုတ်ပါ။ တောင်တော်ကို အသိမ်းအအုပ် မပျက်စေရဘဲ ကျွန်တော်မျိုးက မိတ်ဆွေကို ကူညီရန် လိုက်ပါခဲ့ခြင်းသာ ဖြစ်ပါသည်ဘုရား"

"သင်တို့ ဆင်ခြေ များလှသည်။ တောင်ရာဇိကတိုင်းကို ကျူးကျော်ခဲ့သည်ကတော့ အလွန် ဖြစ်သည်။ ဂဠုန်ပြည် မီးသင့်သည် ကြားရ၏ ၊ သင် မည်သို့ ပြင်ဆင်ဖာထေးနိုင်မည်ကို တင်လော့ စေတလုလင်"

"မှန်ပါ၊ ကျွန်တော်မျိုးတို့ နန်းတော်ရှိ ကျမ်းဟောင်းများတွင် အပင်တို့ကို တမဟုတ်ချင်း ကြီးထွား သီးပွင့်စေနိုင်သော မန္တာန် အတတ်များ လေ့လာမိခဲ့ပါသည်။ ထိုအတတ်ဖြင့် ဂဠုန်ပြည်ကို မူလထက် စည်ပင်ဝပြောစေရန် ကျွန်တော်မျိုး သွားရောက်ပြုပြင်ခွင့်သာ ရလိုပါ၏"

"ပျက်စီးရသည့် နဂါး ဂဠုန် ဂုမ္ဘာန် ရက္ခိုသ် ဂန္ဓဗ္ဗများအတွက်ရော သင် မည်သို့ စီရင်မည်နည်း"

"ကျွန်တော်မျိုး ထိုနယ်မြေကို မြစိမ်းရောင်တောအုပ်နှင့် တစ်ဆက်တည်း ဖြစ်စေ၍ ဂဠုန်ပြည်တိုင်အောင် ဝိရူဠှကနတ်မင်း အာဏာစက်တည်ရာ ဖြစ်စေရန် ဆွေးနွေး ညှိနှိုင်းခဲ့ပါသည်ဘုရား။ ပြန်လည် နေရာချထားခြင်း၊ ပြုစုခြင်းတို့ကို စွမ်းသမျှ ကူညီပါမည်ဟု ကတိပြုခဲ့ပါသည်။ နတ်မင်းကြီးက အရှင် ကုဝေရမင်းကြီးထံ ပေးပို့သော သဝဏ်လွှာကိုလည်း ဆောင်ယူခဲ့ပါသည်"

သဝဏ်လွှာကို ဆက်ရာ ဒေါသကြီးသော နတ်မင်း၏ မျက်နှာဝယ် အရိပ်အမျိုးမျိုး ပြေးလွှားလျက် ရှိလေသည်။ နှုတ်ခမ်းမဲ့လိုက်၊ ခေါင်းမသိမသာ ညိတ်လိုက် လုပ်နေရင်းမှ

"သင် တယ်လည်း အစည်းအရုံး ကောင်းပါ့လား စေတ"

"ဘာတဲ့၊ သူ၏ တူသားဖြစ်သော စေတမင်း၏ အပြစ်ကို သည်းခံခွင့်လွှတ်တော်မူပါရန် ပန်ကြားလိုက်ပါသည် တဲ့၊ မင်းတို့ တကယ့် ငရှုပ်တွေပဲ"

ဒီပတို့ ခေါင်းငုံ့ ပြုံးနေသည်။

"မင်းတောင် မဖြစ်သေးဘဲ သမုဒ္ဒရာနှစ်စင်းက နဂါးပြည်တွေကို ရာဇသံ စေရတာနဲ့၊ တောင်ပြင်က နတ်မင်းကြီးကို အဆွေခင်ပွန်း ဖွဲ့ထားရတာနဲ့ တယ်ဟုတ်နေပါလားကွ ဟေ"

စေတက မဝံ့မရဲ ရယ်ပြလိုက်သည်။ ဒေါသဖြင့် သံတင်းပုတ်ကြီး ပစ်လွှတ်လိုက်မှ ခေါင်းပြတ်နေရမည်ကိုလည်း ကြည့်ရသေး၏ ။ နတ်မင်းက မျက်နှာကို တည်လိုက်ပြီး

"မည်သို့ တောင်းပန်သည်ဖြစ်စေ ငါ့နောက်လိုက်စစ်သည်တွေ လွန်ကျူးခဲ့သည်ကို ငါက အပြစ်ဒဏ် ပေးရမည်သာ။ သင်တို့ အသီးသီး နားဆင်ကြလော့.."

"သောဏ စစ်သူကြီးသည် ယုဂန္ဓိုရ်တောင်မှ ခွာ၍ ငါ၏ နောက်တော်ပါး ကိုယ်ရံတော်အဖြစ် အနီးနေရမည်။ ၅ နှစ် ကာလအတွင်း နန်းတော်မှ အပြင်သို့ မထွက်ရ"

"စစ်သည်ကျော် ဒီပနှင့် သူရဲများသည် မိမိတို့ အပိုင်စား စောင့်ရှောက်ရာ နယ်မှ ထွက်ကာ ဝိဿဏနန်းတော်ကို ၃ နှစ် စောင့်ကြပ်ကြရမည်"

"စေတမင်းသည်ကား ဘုန်းတန်ခိုးအာနုဘော် ကြီးသည် ဟူ၍ ငါ ကိုးစားတော်မူသည်ကို မထောက်ချင့်၊ လူငယ်စိတ်နှင့် မဆင်မခြင် ပြုမူခဲ့သော အမှုများကြောင့် စတုမဟာရာဇ်တောင်ပိုင်းနိုင်ငံတော် တည်ဆောက် ပြုပြင်ခြင်း ကိစ္စများ ပြီးစီးလျင် ငါ၏ ကိုယ်ရံတော်တပ်ကို အုပ်ချုပ်၍ နတ်ဘီလူးသက် ၅ နှစ်၊ လူတို့သက်တမ်းအားဖြင့် နှစ် ၂၅၀ အတွင်း စတုမဟာရာဇ်မြောက်ပြင်မှ အခြားတစ်ပါး မည်သည့်အရပ်သို့မျှ မထွက်မပြုရ။ သင်တို့အားလုံး အကျယ်ချုပ် နေကြရမည်။ အမိန့်တော်"

"ဒါနဲ့ စေတလုလင်.. ငါ့ရဲ့ ဟောဒီက သံတင်းပုတ်လို လောကမှာ အပြင်းဆုံး လက်နက်ကြီး လေးမျိုးကို ငါကြားဖူးတယ်။ သိကြားရဲ့ ဝရဇိန်၊ ယမမင်း မျက်စောင်း၊ အာဠာဝက ဘွဲ့ဖြူလက်နက်တွေ မဟုတ်ဘဲ တစ်ကြိမ်မှာ မိုးကြိုးသုံးချက် ကျစေတဲ့ လက်နက်ကိုတော့ ငါမကြားဖူး၊ မင်း ဘာလက်နက် စွဲကိုင်ခဲ့သလဲ"

ဟု တစ်ဆက်တည်း မေးမြန်းလာရာ စေတက စာပေလက်နက်အစွမ်းပါ ဟု ဖြေလိုက်လေသည်။

အမိန့်တော်ကို သားတော်တစ်ပါးဖြစ်သော ဣန္ဒက ရေးသားပြီး ဗိမ္ဗိသာရဘုရင် ဇနဝသဘ နတ်စစ်သူကြီးထံ အပ်၏ ။ နတ်ဘီလူးများအကြား လှည့်လည်မောင်းခတ် ကြေညာရပြီး စေတမင်းကို နတ်ဆိုးစာရင်း သွင်းလေသည်။ နတ်ဘီလူးများ အကြား၌ကား စေတမင်း အမည်သည် ဟိုးဟိုးကျော်လျက် တောင်ပြင်တိုက်ပွဲကြီးအကြောင်းကို ပြောမဆုံးနိုင် ဖြစ်နေကြတော့သည်။

"စေတမင်းလောက် ကြီးအောင် ကိုယ်ကို ဖန်ဆင်းနိုင်သူ ရှိရင် ငါ့သံတူကြီး ပေးမဟေ့"

"သူ့လောက်ကြီးနိုင်မှတော့ မင့်သံတူကို ဘာလုပ်မလဲကွ။ ကျောက်တောင်ကိုပဲ ဖဲ့ပြီး ခုတ်တော့မပေါ့"

"ငါကတော့ တစ်ခါကန်ရင် ဂုမ္ဘာန်ကြီး လေးငါးဆယ်ကောင် လွင့်စင်ကုန်တယ် ဆိုတာပဲ သဘောကျတယ်။ ဘယ်လောက် အားကြီးလိုက်သလဲ"

"ဒါ ဘာဟုတ်သေးလဲ၊ ဂဠုန်တွေရဲ့ အဓိကရ လက်ပံပင်ကြီးကို အမြစ်က ဆွဲနှုတ် တင်းပုတ်ဖြစ်အောင် သပ်သွားတာ မြင်ပြီး ဂဠုန်တွေ အသက်ရှူ ရပ်ကုန်တယ် ဆိုကော"

"အလွန်ကြီးပါကွာ၊ တစ်ယောက်တည်းနဲ့ နယ်တစ်ဝက်လောက်ကို တစ်ချက်တည်း သိမ်းလိုက်တယ် ဆိုတဲ့ စကားတွေလည်းပဲ ကြားနေရတာ။ ကြည့်ရတာ မြင်းမိုရ်ထိပ်က တာဝတိံသာလောက်ကို အသာလေး ကျော်နိုင်မယ့်ပုံပဲ"

"နတ်ပြည် သုံးထပ်လောက် ဖျက်နိုင်တယ် ပြောနေကြတယ်။ နောင်တစ်ချိန် အလွန် အဖျက်စွမ်းအားကြီးတဲ့ ဘီလူးမင်းကြီး ဖြစ်လာလိမ့်မတဲ့"

ဘီလူးစကားမို့ ဖျက်ဆီးသည်များပဲ ဆိုကြသည် ထင်စေဦး။ သူတို့ကတော့ စေတမင်းကို နတ်ဆိုးဟု မြင်ရမည့်အစား အားကျခန့်ညားနေကြသည်က များလေသည်။

"အရင်က စေတဟာ ဒီလို မဟုတ်ပါဘူး။ ခပ်အေးအေး ကုပ်ကုပ်နဲ့ ခိုက်ရန်မီးပွားတောင် မရှိဘူးဆို"

"ဟုတ်တယ်၊ သူပြန်လာမှ ဘယ်လိုဖြစ်လို့ သည်လောက် အာနုဘော် ကြီးလာပါလိမ့်"

"ကုဝေရမင်းကြီး မိန့်တယ် တဲ့။ စေတဟာ လူ့ပြည်မှာ သူတစ်ပါးတို့ ပြုနိုင်ခဲတဲ့ အမှုကြီးများစွာကို မဆုတ်မဆိုင်း နှေးဖင့်ခြင်းအလျဉ်းမရှိ ပထမစေတနာဇောကံနဲ့ လုပ်ခဲ့သတဲ့။ စေတနာ သဒ္ဓါတရား အားကောင်းပြီး စွန့်လွှတ်အနစ်နာခံလိုစိတ်လည်း အပြည့်ထားရှိခဲ့သတဲ့။ ငယ်သားတွေ အပြစ်ရှိရင် သူက ခံတယ်၊ ပြည်သူအကျိုးအတွက် သူနစ်နာသော်လည်း ကျေနပ် ဝမ်းသာတတ်သတဲ့။ ဒါမျိုးတွေကြောင့် ဒီလောက် ဘုန်းတန်ခိုး တက်လာတာလို့ ဆိုနေကြတယ်"

"ဒါပေမယ့် သူက အလှူအတန်းတော့လည်း နည်းတယ်ဆို"

"ဟ.. ကောင်ရ၊ စေတနာ အဓိကကွ။ သူတော်ကောင်းစိတ် အမြဲရှိရင်၊ တရားကို နှလုံးသွင်း နေနိုင်ရင် ရမယ့်အကျိုးက အမြတ်ဆုံးပဲဆိုတာ မကြားဖူးဘူးလား"

"သူလောက် လူသတ်တာလည်း သူပဲတဲ့ဟ"

"ဒါကတော့ နှလုံးသွင်း ကွာလို့ ရှိမှာပေါ့ကွာ၊ သူက ငါတို့လို ဖျက်လိုဖျက်ဆီးစိတ်နဲ့ လျှောက်သတ်ခဲ့တာမှ မဟုတ်ဘဲ၊ စစ်ပွဲအမြန် ပြီးပါစေ၊ အကုသိုလ်ကို သူက အများဆုံး ခံရပါစေ လို့ မှတ်ယူသတဲ့ဟ"

"ဘုရား.. ဘုရား၊ ကြောက်စရာ အနစ်နာခံမှုကြီးပါလား"

"ဒါ့ကြောင့် သူတစ်ထူးတို့ မလုပ်ဝံ့ မလုပ်နိုင်သည်တို့ကို လုပ်ခဲ့သော သူရဲ လို့ ဆိုကြတာပေါ့လေ"

"ငါတော့ နတ်ဘီလူး စေတမင်းထက် လူ့ဘဝက သူရဲကို ပိုပြီး သဘောကျသွားပြီ ဟ ကောင်ရေ"

..........x...........x............x...........x...........

 (ဆက်ရန်..)  နန်းသိမ်းပွဲ (ဇာတ်သိမ်း)

Written by သင်္ခရာဇာ

End date: February 3, 2022