နန်းသိမ်းပွဲ (၂)

 ဝေလုက၏ အကြောင်းကြားမှုကြောင့်

ဗန္ဓကတောဝယ် ညီနောင်လေးဦးသားတို့ ဆုံမိကြပြန်သည်။ ခရီးရောက်မဆိုက် ဝေလုက ပြောသည်။

"ရာဇဘိသေကသဘင် ဆင်ယင်ဖို့ကို ဝေဿဝဏ် နတ်မင်းကြီး အမိန့်တော် မှတ်လိုက်ပြီ အစ်ကိုတို့။ မည်သို့သော အကြောင်းရှိသည်ဖြစ်စေ ခမည်းတော်၏ အရိုက်အရာ ထီးနန်းအမွေကို ဆယ့်ငါးရက် လွန်လျင် စေတမင်းသား ဆက်ခံသိမ်းယူ အုပ်စိုးစေတဲ့ဗျ"

"အေး.. ကောင်းတာပေါ့ကွ"

"ကောင်းတာက ဟုတ်တယ်၊ ကြာလည်း ကြာနေမင့်ပဲ။ ဒါပေမယ့် ခင်ဖုန်းက ခေါ်မရတော့ဘူးလား"

"သူမှ မလိုက်ချင်တာ ငါတို့က အတင်းအကြပ် ဖမ်းဆီးလာရမလား ဝေလုကရဲ့"

"ဘမရ ပြောလိုက်ရင် ဒီလိုချည်းပဲ။ အစ်ကို ဒီပရော ဘယ်လို ကြံထားလဲ"

"ငါလည်း မတတ်နိုင်ဘူး၊ သူ့သဘောအတိုင်း ရှိပါစေ"

"ဒီလိုဗျ၊ အစ်ကိုတို့ မင်းယဉ်နရသိင်္ခကို သိတယ်မဟုတ်လား"

ပုဂံခေတ်က အလောင်းစည်သူမင်း၏ မြေးတော်ကို ဆိုလိုခြင်း ဖြစ်၏ ။ မင်းယဉ်နရသိင်္ခသည် အလောင်းစည်သူ၏ သမီးတော်နှင့် မိဖုရားဘက်မှ မြေးတော်နှစ်ပါးအား မိဖုရားမြှောက်ကာ မိဖုရားသုံးပါးဖြင့် တစ်ပြိုင်တည်း ဘိသိက်ခံ နန်းတက်လာခြင်းလည်း ဖြစ်၏ ။

"အေး.. သိတယ်"

"ငါတို့က ညီတော်ကို သူ့လို မိဖုရား ၃ ပါး ချစ်ချစ်ခင်ခင်နဲ့ နောက်တော်က အတူတကွ ပါကြစေချင်တာ မဟုတ်လား"

ဒီပတို့ ပြုံးချင်ချင်၊ ဝေလုက က စကားဆက်၏ ။

"ဒါ့ကြောင့်လည်း ငါ အသည်းအသန် ကြိုးစားခဲ့တာပေါ့။ ဒါပေမယ့် တွင်းနှုတ်ခမ်းရောက်မှ ရေဖိတ်စင်ကျရသလို ခင်ဖုန်းကို ဘယ်လိုမှ ခေါ်မရတော့ဘူး ဆိုတာ မင်းတို့လည်း အသိပဲ"

"အင်း"

"မရတော့လည်း တောင်နန်း မြောက်နန်း နှစ်ပါးပေါ့ကွာ၊ မနည်းပါဘူး။ သူ့အတိုင်းဆို လူပျိုမင်းပဲ ဖြစ်မှာ"

"မင်းတို့ မသိသေးတာ တစ်ခုရှိတယ်"

ဒီပက စကားဖြတ် ပြော၏ ။ ညီအစ်ကိုများ အာရုံစူးစိုက် ကျလာမှ

"သူ သတိရလိုက်တဲ့သူ နောက်တစ်ယောက် ရှိသေးသကွ"

ပြောရင်း ဟဲဟဲဟဲ ဟု ရယ်လိုက်၏ ။ ကျန်သူများ အလုအယက် မေးကြပြီ။

"ဘယ်သူလဲဟ.. ရွာကလား"

"မဟုတ်ဘူး"

"ရှမ်းပြည်ကလား"

"မဟုတ်ဘူး"

"ဟံသာဝတီက.. ဒဂုံက"

ဒီပက ပြုံးကာ ခေါင်းရမ်းသည်။

"ရွှေဘို နေပြည်တော်က"

"အေး"

"ဝိုး"

"သူကတော့ ညီမလေးလိုပဲ သဘောထားတာပဲ၊ ဒါပေမယ့် အဲသည် ကောင်မလေးကမှ သူ့အတွက် အဦးဆုံးသူ၊ တို့ ညီထွေးနဲ့ ပထမဆုံး ပတ်သက်သူလို့ ဆိုရမယ်"

"ဘယ်သူလဲ နောင်တော်"

"ပဒုမ္မဝတီ.. ကြာပန်းမင်းသမီး။ အလောင်းဘုရားရဲ့ ကိုယ်လုပ်တော် ခင်သူက မြင်တဲ့ သမီးတော်ပဲ။ ဒါပေမယ့် မင်းတရားက သူ့ကို အကြီးတွေနဲ့ ထပ်တူ ပစားပေးတယ်။ ပဒုမ္မဝတီဘွဲ့ကိုလည်း မိဖုရားခေါင်ကြီးနဲ့အတူ ရခဲ့သူပဲ"

"အိုး"

"ညီထွေးနဲ့ ဘယ်လို ပတ်သက်နေတာလဲ"

"စံနက်ကျော် ရွှေဘိုကို ရောက်စကတည်းက ငအောင်ဇေယျနဲ့ ခင်ယွန်းစံတို့က နောင်မှာ သူတို့နှစ်ဦးကို နေရာချထားမယ်လို့ တိုင်ပင်ခဲ့ကြတယ်။ ဒါကို ပဒုမ္မဝတီလည်း သိတယ်။ ဒါပေမယ့် အဲဒီတုန်းက သူ့အသက် ဆယ့်သုံးနှစ်ပဲ ရှိသေးတာ"

"သြ.. ဒါကို ညီတော်ရော သိခဲ့လား"

"ရိပ်မိတယ် ဖြစ်မယ်၊ ဒါ့ကြောင့် ငါတို့ သူ့ကို ပြောတုန်းက သူ အဲဒီမင်းသမီးကို ဖျတ်ခနဲ သတိရသွားတာ။ သူနဲ့ စီစဉ်ထားခဲ့ဖူးတယ် ဆိုတာကို အမှတ်ရမိပုံပဲ"

ဝေလုက အားတက်သွားသည်။

"အဆင်သင့်လိုက်လေ ဒီပရာ၊ ငါ လိုချင်တာလည်း ဒါမျိုးပဲ။ တို့ လုပ်လက်စနဲ့ နောက်တစ်ယောက်လောက် ဆက်ကြိုးစားလိုက်ကြရအောင်"

ဝေလုက မျက်စ ပစ်ပြသည်ကို ဗျဂ္ဂက စိတ်ပျက်လက်ပျက်ဖြင့်

"ငါတော့ ဘာမှ မစွမ်းနိုင်ခဲ့ဘူးကွာ။ မင်းနဲ့ ဒီပတို့ တစ်ယောက်စီ ရှာပေးခဲ့ချိန် ငါတို့မတော့ လူလည်း မတွေ့၊ ကျောက်လည်း မရ၊ အပါလည်း မခေါ်နိုင် ကိုယ့်ဘာသာတောင် စိတ်ကုန်တယ်။ မလုပ်ချင်တော့ဘူး"

ဘမရ ကမူ

"အဲဒါ တို့အတွက် အခွင့်အရေးပေါ့ ဗျဂ္ဂရ၊ ခု ငါတို့အလှည့်ပေါ့"

"ဘာလဲ.. မင်းမိတ်ဆွေကြီးကို အားကိုးဦးမလို့လား ဘမရ"

"ဟာ.. မဟုတ်ပါဘူးဗျာ၊ သူ့တော့ ကြောက်ပါရဲ့။ သည်တစ်ခါ ကိုယ့်နည်းကိုယ့်ဟန်နဲ့ ခွန်အားသုံးရလည်း ပုံပြီး အားထုတ်လိုက်မယ် စိတ်ကူးတာပါ"

အရေးကြီးသော မေးခွန်းကို ဝေလုက မေးသည်။

"ခု သူက ဘယ်မှာတဲ့လဲ"

"အဲ"

တကယ်တမ်း ရှာဖွေရသည်မှာလည်း ဝေလုကပဲ ဖြစ်၏ ။ သူက အသိအကျွမ်းများပြီး လှည့်လည်သွားလာနေသူဖြစ်၍ သတင်းစုံသည်။ ပဒုမ္မဝတီ၏ သတင်းကို သူပင် ရလာခဲ့လေသည်။

"သိပ်အဝေးကြီး မဟုတ်ဘူး၊ တောင်ပြင်မှာတင် ရှိနေတာဗျ"

"ဟေ... မြစိမ်းတောင်ဘက်မှာပေါ့"

"ဂုမ္ဘာန်တွေရဲ့ နယ်တော့ မဟုတ်ဘူး။ လက်ပံတောနဲ့ တောင်နန်း အစပ်မှာပဲ၊ ခပ်ညံ့ညံ့ အမျိုးမှာ ဖြစ်သတဲ့"

"ငါတို့ အသာလေး သွားသုတ်ရမှာလား"

ဒီပ တွေဝေနေ၏ ။

"မရလောက်ဘူးကွ။ အဲဒါ ဝိရူဠှက နတ်မင်း လက်အောက်ခံ နယ်မြေတွေ။ ပြီးတော့ အဲဒီဘက်က ငါတို့ နတ်ဘီလူးတွေလို မရိုးရှင်းဘူး။ ဂုမ္ဘာန်

ရက္ခိုသ်တွေ ဂဠုန်နဂါးတွေ ဂန္ဓဗ္ဗနတ်တွေ အမျိုးစုံ ကျင်လည်ရာ ဒေသကြီး။ တခြားပြည်တွေနဲ့ မတူတော့ ငါတို့ သွားရင် ပြဿနာတွေ ရှုပ်ကုန်မယ်"

"ညီထွေးကလည်းကွာ.. ခုမှ ဥပုသ်ဆောင် ဝင်နေတယ်"

ဟုတ်၏ ။ ရောရုဝမှ ပြန်လာကတည်းက အသားမစားတော့သော စေတသည် ယခုအခါ ထီးမွေနန်းရာ မဆက်ခံမီ တစ်ပတ်ခန့် ကို ခမည်းတော်နှင့်အတူ ဥပုသ်ဆောင် ဝင်နေသည် ဆို၏ ။ အိမ်ရှေ့ဆောင် အမှုထမ်းတစ်ဦးကို ခေါ်၍

"စေတ နန်းသိမ်းမယ့် အစီအစဉ်က ဘယ်လိုတဲ့တုန်း"

ဟု မေးရသည်။ အမှုထမ်းက

"ယခုတစ်ပတ် ဥပုသ်တော် ဝင်မယ်။ နန်းသိမ်းဖို့ တစ်ပတ်အလိုမှ ခမည်းတော်မင်းကြီးနဲ့အတူ ထွက်လာပြီး ရာဇဘိသေကသဘင်ကို စီရင်ပါလိမ့်မယ်။ ယခုတော့ အမတ်ချုပ်နဲ့ နရဏီမင်းသမီးတို့ ကြိုတင်ပြင်ဆင်နေကြပါတယ် ။ အိမ်ရှေ့မင်းက အမတ်ကြီး ဇေယျသူ ပြင်ဆင်ထားတာတွေကို ဖျက်ပစ်တတ်လို့ အသေးအဖွဲတွေလောက်ပဲ လုပ်နေတာပါ"

"သူက ဘာတွေ ဖျက်ပစ်လိုက်တာလဲ"

"မင်းခမ်းမင်းနားတချို့ကို ရှေးထုံးတွေ ပယ်လိုက်တယ်။ အမတ်ကြီး အပါအဝင် အချို့က မကြိုက်ကြဘူး၊ ပြီးတော့ မင်းခဏ်းတော်တွေ၊ ကျိုင်း ဝေါပလာတွေကအစ စာရင်းထုတ်ပစ်လိုက်တယ်"

"ဟေ.. နန်းတက်တဲ့အခါ ဝေါပလာ မစီးနင်း၊ ကျိုင်းချက် မကိုင်ဘူး ဆိုတဲ့ သဘောပေါ့"

"မှန်ပါတယ် အရှင်၊ အရှင့် ခမည်းတော်ရဲ့ သံတူကြီးလည်း ဗြဲတိုက်မှာပဲ သိမ်းဆည်းထားရပါတယ်။ လက်နက်စွဲကိုင်ခြင်း မရှိတဲ့ ဘီလူးမင်း ဖြစ်လာလိမ့်မယ်လို့ နန်းတွင်းသားတွေ သုံးသပ်နေကြတယ်"

"အေးပေါ့.. အလှည့်ကျပေါ့လေ။ သူ့အတွက် တစ်ခုခု လုပ်ပေးဦးမှပါ"

"အိမ်ရှေ့စံမင်းသား သုံးမယ် မထင်ပါဘူး အရှင်၊ သဘင် ကျင်းပမယ့် အစီအစဉ်တွေလည်း ထက်ဝက်လောက် ပြုတ်သွားပြီ။ ခပ်ရှင်းရှင်းနဲ့ ပေါ့ပေါ့ပါးပါး နန်းတက်မယ့်ပုံပါ"

"တို့နဲ့ တွေ့တိုင်းလည်း သူ့ကို အိမ်ရှေ့မင်းဆောင်း ထီးနီ မိုးထားရတာ တစ်ခါမှ မတွေ့ဖူးဘူး။ ဒီကောင် လူ့ဘဝက အကျင့်တွေ မပျောက်ဘူး ဖြစ်မယ်"

"ဒါနဲ့ မိဖုရား နောက်တစ်ပါးရော ရောက်ပြီလား"

"မင်းနှစ်ပါး ဥပုသ်ဆောင်တော်က ထွက်လာမယ့် နေ့မှာ ဆိုက်ရောက်ပါလိမ့်မယ်။ မင်းမိဖုရားတွေ ဖူးမြော်ပြီးရင် ခမည်းတော်မင်းကြီးက ဟိမဝန္တာကို သွားဖို့ ပြင်တော့မယ်လို့ ဆိုတယ်။ အိမ်ရှေ့မင်း နန်းတက်ပြီး နောက်တစ်နေ့လောက် ဖြစ်ပါလိမ့်မယ်"

"အိမ်း.. မင်း သွားလို့ရပါပြီ။ ကဲ.. ငါတို့ အစီအစဉ်ကို ဘယ်လို လုပ်ကြမလဲ"

"သူထွက်လာရင် အချိန် တစ်ပတ်ပဲ ရတော့မှာ ဒီပ။ အခမ်းအနား ပြင်ဆင်ဖို့လည်း ရှိသေးတယ်။ မီပါ့မလား"

ထိုအခိုက် ဝိဿဏ နေပြည်တော်မှ နတ်စစ်သူကြီး ဇနဝသဘ ရောက်လာ၏ ။ ဗိမ္ဗိသာရမင်းဘဝမှ လာသူဖြစ်၍ အလွန်ဘုန်းတန်ခိုးကြီးမားသည်။ သူက စေတမင်းသား၏ နန်းတက်ပွဲအတွက် လိုအပ်သည်တို့ကို စုံစမ်းရန် ကုဝေရနတ်မင်းကြီး စေလွှတ်ကြောင်း ဆိုရာ ဒီပတို့ ညီနောင်လေးဦးက ဧည့်ခံ၍ ပြည့်စုံပါကြောင်း ပြန်ကြားလိုက်ကြသည်။ ထို့နောက် စစ်သူကြီး ပြန်သွားသောအခါမှ

"ဟေ့.. ငါတို့ လူတစ်ယောက်ကို မေ့နေတာပဲကွ"

"လုပ်ပြန်ပြီ။ ဝေလုက.. ဒီတစ်ခါရော ဘယ်သူလဲ"

"ငါတို့ရဲ့ အစွမ်းထက် စစ်သူကြီး ကြီးလေကွာ"

"အိမ်း၊ ဟုတ်ပါရဲ့.. သူ ဘယ်မှာတဲ့လဲ"

"ယုဂန္ဓိုရ် တောင်ထိပ်မှာ တာဝန်ကျနေတာ"

"အိမ်း.. မင်း တော်တယ် ဝေလုက"

နတ်ဘီလူး ညီနောင်များသည် မြင်းကိုယ်စီ ဆွဲလျက် ချက်ချင်း ယုဂန်တောင်သို့ နှင်သွားကြလေသည်။ 

(ဆက်ရန်..)  နန်းသိမ်းပွဲ (၃)

Written by သင်္ခရာဇာ

End date: February 5, 2022