ရဲခေါင် (၃)

ဗိုလ်ရဲခေါင်သည် ထိုညက အိပ်မပျော်ဘဲ လရောင်အောက်၌ မှောင်မည်းနေသည့် ဧရာဝတီမြစ်ပြင်ကြီးအား ငေးမောကြည့်နေ၏ ။ သူ၏ ရင်တွင်း၌ လာမည့် တိုက်ပွဲကြီးနှင့် နိုင်ငံတော်၏ အနာဂတ်အတွက် စိတ်မအေးနိုင် ဖြစ်နေရသည်။

မိမိတို့သည် အင်အားကြီးမားလှသော အင်္ဂလိပ်တို့၏ ရေတပ်မတော်ကြီးအား မည်မျှကြာအောင် ထိန်းထားနိုင်ပါမည်နည်း။ ဗိုလ်မင်းကြီးများ၏ ပွင့်လင်းလှသော သုံးသပ်ချက်များအရ မိမိတို့ ခံတပ်တော် ၂ ခုသည် တစ်ရက် တစ်ညထက် ပိုမခံနိုင်ဟု အဖြေထွက်နေသည်။ အဝေးဆီ၌ ဆီမီးရောင်လက်လက် မြင်နေရသော မင်းလှခံတပ်ကြီးသည် မှောင်မည်းတိတ်ဆိတ်လျက် ထီးထီးကြီး ရှိနေ၏ ။

မိမိတို့ ကွေ့ချောင်းခံတပ်ကိုမူ သူတို့ မင်းလှတပ်တော်သားများ မြင်နိုင်မည်မထင်၊ ကွေ့ချောင်းခံတပ်တော်သည် တောင်ကမ်းပါးယံကို ဖောက်၍ အတွင်း၌ တည်ထားသောကြောင့် မြစ်ဘက်မှ ကြည့်လျင် ကမ်းပါးစောက် ပြောင်ပြောင်သာ မြင်ရ၏ ။ မဟာဗျူဟာအရ မြစ်ကွေ့အလွန်တွင် ထင်ရှားစွာ မြင်နေရသော မင်းလှခံတပ်ကိုသာ လှေတပ်များ အာရုံစိုက်ကြစေရန်နှင့် ကွေ့ချောင်းခံတပ်မှ ရုတ်တရက် ချုံခို တိုက်နိုင်ရန် ရည်ရွယ်ထားခဲ့သဖြင့် မင်းလှတပ်ကို မြင်သာစေပြီး ကွေ့ချောင်းကိုမူ သတင်းမျှ မပေါက်ကြားစေရ၊ အထူး လျှို့ဝှက်ထားခဲ့ကြသည်။

အင်္ဂလိပ်စစ်သင်္ဘောများ ဆန်တက်လာလျင် မိမိတို့နှင့် ဦးစွာ တွေ့ရမည်ဖြစ်သည်။ ကွေ့ချောင်းကျမှ မင်းကြီး မဟာသမိန်ဗရမ်းတို့ထံ ပေါက်မည်။ မိမိတို့ကလည်း ခံတပ် အဆင့် ၃ ဆင့်၌ အမြောက် သေနတ်များ စီလျက် အသင့်ပြင်ထားခဲ့သည်။ ဆယ်ဆမက များသည့် ရန်သူတို့ကို ကြာနိုင်သမျှ ကြာအောင် အသေခံ၍ ထိန်းချုပ်ထားကြရပေလိမ့်မည်။ မိမိတို့က သတ္တိပြောင်စွာ ခံနိုင်ခဲ့သည် ဆိုလျင် တစ်ဖက်ကမ်းရှိ တပ်များ အားတက်ကြမည့်အပြင် နေပြည်တော်မှ အမိန့်ကို ဖီဆန်ကာ တိုက်ခိုက်လာကြမည့် မျိုးချစ်သူရဲများလည်း နေရာအနှံ့အပြား ပေါ်ထွက်လာနိုင်ပေသည်။ ယခုပင် ကနောင်မင်း၏ သားတော်များက ပုန်ကန် ခုခံလိမ့်မည်ဟု အတွင်းသတင်း ကြားနေရပြီးပြီ။

ယင်းမျှော်လင့်ချက်ကြောင့် ဗိုလ်ရဲသည် မိမိချစ်ခင်သော ရဲဘော်ရဲဘက်များနှင့် အိမ်သူ မငြိမ်းသာ၊ မိမိ ဘဝတစ်ခုလုံးတို့ကို စွန့်လွှတ်ကာ နောက်ဆုံးအချိန်အထိ ကျူးကျော်သူတို့ကို ရင်ဆိုင်ရပေလိမ့်မည်။ ဗိုလ်ရဲကဲ့သို့ပင် မင်းကြီး မင်းလက်ဝါးတို့လည်း အဆုံးစွန် တိုက်ခိုက်ရန် ဆုံးဖြတ်ထားပြီး ဖြစ်၏ ။ သူသည် မင်းလက်ဝါးကြီး၏ မဖုံးမကွယ် လပ်နေသော ဘယ်မျက်လုံးကို စိတ်တွင် မြင်ယောင်လာလျက် မင်းကြီး ဆိုဆုံးမခဲ့သည့် စကားသံကိုလည်း ကြားယောင်လာရသည်။

"သည်မျက်လုံးတစ်ဘက်က ကိုယ်မကျွမ်းကျင်ရာမှာ မနေသင့်ကြောင်း ပြနေတာပဲကွ။ ငါငယ်ငယ်က ယာလုပ်ရရင်း သစ်ငုတ်ထိုးမိလို့ ကွယ်ခဲ့ရတဲ့ မျက်လုံး၊ မတတ်ဘဲ လုပ်တဲ့ တောင်ယာအလုပ်တွေမှာ ယောက္ခမ အထင်သေး အမြင်သေး ခံခဲ့ရတာတွေဟာ မင်းမှုထမ်းပြီး အရည်အချင်းပြနိုင်တော့မှ ကျေသွားခဲ့တာ။ ဒါ့ကြောင့် ငါ့ကိုယ်ခန္ဓာကို မြင်ရင် မျက်လုံးကိုလည်း တွဲမြင်နိုင်ဖို့၊ လူဆိုတာ ကိုယ်နဲ့ တန်ရာကို လုပ်တတ်ဖို့ ယှဉ်တွဲ ပြထားတာပေါ့ကွာ"

ဖြောင့်မတ်ပွင့်လင်း၍ ကိုယ်နှုတ်ဖြင့်ပါ သတိပေး ဆုံးမတတ်သော မင်းကြီးအား လေးစားမိသည့်အလျောက် သူသည်လည်း မိမိအရည်အချင်းကို ပြနိုင်ရန် စောင့်ခဲ့ရသည်မှာ ကြာပြီ။ ယခင်အကြိမ်များက အမှန်တကယ် မထုတ်ဖော်ခဲ့ရဟု ထင်ခဲ့သမျှ ယခုချိန်တွင်တော့ အစွမ်းကုန် ဖော်ထုတ် ပြသလိုက်မည်ဟု အားခဲလျက် ဓားကို ကျစ်ကျစ်ပါအောင် ဆုပ်လိုက်မိ၏ ။

၁၈၈၅ နိုဝင်ဘာ ၁၇ ရက်၊ နံနက် မိုးသောက် အလင်းမရောက်တရောက်တွင် ကွေ့ချောင်း ခံတပ်တော်ကြီးသို့ တောင်အရပ်မှ လာသော မြင်းလျင်တစ်စီး ရောက်လာသည်။ တစ်ညလုံး အပြင်းနှင်ခဲ့ရသဖြင့် ဆက်သားမှာ ပင်ပန်းနွမ်းနယ်နေသော်လည်း သူတို့ ဗိုလ်များရှိရာ အဆောင်သို့ ချက်ချင်း ဝင်တွေ့ပြီး

"ပြည်လုံးအံ့ လှေသင်းဗိုလ် မင်းကျော်သိဒ္ဓိရန်အောင် ထံ ကျွန်တော်မျိုးတို့ ဆင်ပေါင်ဝဲခံတပ်မှ ဗိုလ်မင်းများက စေလွှတ်လိုက်ပါသည်။ ဆင်ပေါင်ဝဲ စစ်အောင်ခန်း ခံတပ်သည် အင်္ဂလိပ်နယ်ချဲ့တို့ကို ရွပ်ရွပ်ချွံချွံ ခုခံခဲ့ပါသော်လည်း အမြောက်ဗုံးမိုး ရွာသွန်းသကဲ့သို့ စိစိညက်ညက် ချေမှုန်းခံရသဖြင့် ခံတပ်တော်ကို စွန့်ခွာ၍..."

ဗိုလ်မှူး ရန်အောင်က တောက်တစ်ချက် ပြင်းစွာခေါက်၍ အရေးကြီးသည့် စစ်သတင်းတို့ကိုသာ မေးမြန်းပြီး မင်းလှခံတပ်သို့ လှေလျင် စေလိုက်သည်။ ရဲခေါင်ကိုမူ အနားတွင်သာ မြဲနေစေ၏ ။ ခံတပ်တစ်ခုလုံးကို တပ်လှန့်လိုက်ပြီးနောက် သူတို့သည် အပေါက်များကို ပိတ်၍၊ တိတ်ဆိတ်ငြိမ်သက်စွာ ငံ့လင့်နေကြတော့သည်။

အတန်ကြာလျင် မြစ်ပြင်၌ စစ်သင်္ဘောများစွာကို တန်းစီလျက် မြင်လာရ၏ ။ အင်္ဂလိပ်တို့သည် ခေတ်မီ အားကောင်းသော မှန်ပြောင်းကိရိယာများဖြင့် ဝန်းကျင်ဝဲယာကို ကြည့်ရှု စူးစမ်း လိုက်ပါလာကြပေလိမ့်မည်။ ထိုအခါ မားမားကြီး တွေ့မြင်နေရသော မင်းလှခံတပ်ကြီးကို အာရုံစိုက်နိုင်ကြစေရန် ရည်ရွယ်၍ သူတို့က အသက်အသံ မပြုစေဘဲ အရိပ်အယောင်မျှ မမြင်ရအောင် ပုန်းကွယ်နေကြခြင်း ဖြစ်လေသည်။

တွက်ဆသည့်အတိုင်းပင် မြစ်အနောက်ဘက်ကမ်း မင်းလှခံတပ်မှ အမြောက်ကြီးများ ရန်ကို ရှောင်သည့် အနေဖြင့် စစ်သင်္ဘောများသည် ကွေ့ချောင်းခံတပ်ရှိရာ မြစ်ကွေ့ တောင်ကမ်းပါးယံဘက်မှ ကပ်၍ လာကြ၏ ။ မြစ်ပြင်အထက် ပေ ၄၅၀ ခန့်တွင် ရှိနေသော ကွေ့ချောင်းခံတပ်ကြီးမှာ ပျောက်နေပြီး အနီးကပ်လာမှ အပိုင်ပစ်ကြရန် ကြံရွယ်ထားသည်။

အမြောက်ဗိုလ်က အကွာအဝေး တွက်ချက်ကာ ရှေ့ဆုံးမှ သင်္ဘောသုံးစင်းကို ပစ်ချရန် ပြင်သည်။ ရဲခေါင်က မပစ်စေချင်၊ အနည်းငယ်ခန့်ကို မင်းလှခံတပ်မှ ပစ်မီသည်အထိ လွှတ်ပေးလိုက်ပြီးမှ ခါးလယ်ကို ဖြတ်၍ ပစ်စေချင်သည်။ သို့သော် အမြောက်ဗိုလ်မှာ အလွန် စိတ်ဓာတ် တက်ကြွနေပြီး တစ်စင်းမှ မကျော်စေရဟု ကြွေးကြော်နေခဲ့သူ ဖြစ်၏ ။ ယခုလည်း ပိုင်ပြီအထင်နှင့် ကပ်လာသည့် သင်္ဘောများကို ပစ်ချလိုက်လေပြီ။

ရှေ့ဆုံးမှ သင်္ဘောသည် ချက်ချင်း ခွာလျက် မြစ်လယ်ဘက် ထွက်သွားသဖြင့် အထိအခိုက် နည်းပါးသွားခဲ့သလို တတိယမြောက် သင်္ဘောသည်လည်း ဦးလှည့် ပြန်နိုင်သဖြင့် မနစ်မြုပ်လိုက်ဘဲ အလယ်တွင် ညပ်နေသော စစ်သင်္ဘောတစ်စင်းသာ ဝိုင်းပစ်ခံရပြီး သင်္ဘောပေါက်လျက် တဖြည်းဖြည်း နစ်မြုပ်သွားသည်ကို တွေ့ရ၏ ။ မမျှော်လင့်သော တိုက်ခိုက်မှုကို ခံလိုက်ရသော်လည်း ဆင်ပေါင်ဝဲ၌ တိုက်ပွဲ ကြုံခဲ့ရပြီးဖြစ်၍ အင်္ဂလိပ်တို့မှာ ပေါ့ဆမနေချေ။

စစ်သင်္ဘောများ အားလုံးသည် ရပ်တန့်သွားကြပြီးလျင် သူတို့ ခံတပ်ကြီး ရှိရာသို့ အမြောက်တထိန်ထိန် ပစ်ခတ်ကြတော့၏ ။ သို့သော် တောင်နံရံအတွင်းရှိ ခံတပ် နှစ်ဆင့်နှင့် အပေါ်ဘက်တွင် ကွယ်နေသော တစ်ဆင့်ကို ထိရောက်အောင် မဖြိုခွင်းနိုင်၊ အမြောက်ဆံများ အချည်းနှီးဖြစ်သည်သာ ရှိနေလေသည်။

မြန်မာတပ်များမှာ စစ်သင်္ဘောကြီးတစ်စင်းကို နှစ်မြှုပ်လိုက်နိုင်ခဲ့သည့်အတွက် ဝမ်းသာပျော်ရွှင်နေကြ၏ ။ ယမ်းငွေ့တဖုံးဖုံး ပေါက်နေကြသည့် စစ်သင်္ဘောများ၏ ပစ်ခတ်မှုကို ချောင်းကြည့်ရင်း ရယ်မောနေကြ၏ ။ သို့သော် ကောက်ကျစ် ဉာဏ်များလှသည့် အင်္ဂလိပ်တို့၏ ပရိယာယ်ကိုမူ သူတို့ မသိနိုင်ခဲ့ချေတကား။

သူတို့ ကွေ့ချောင်းခံတပ်သို့ ယခု အင်္ဂလိပ်စစ်သင်္ဘောများ ရပ်တန့်နေသည့်ဘက်မှ တက်၍ မရနိုင်၊ ချောက်ကမ်းပါး မတ်စောက်သည်၊ ခရာတော ကိုင်းတောကြီးများ ထူထပ်လွန်းပြီး စစ်တပ်ကြီးတစ်တပ် တိုးဝှေ့နိုင်လောက်သည့် အခြေအနေတွင် မရှိ၊ ကွေ့ချောင်းကို လွန်မှသာ တက်ရန် လမ်းသာ၏ ။ သို့သော် ဓားလွယ်ခုတ်ရှိ မင်းလှခံတပ်ကို ရင်ဆိုင်ရမည်ဖြစ်ပြီး နှစ်ဘက်ညှပ်ပစ်ခံရမည်ဖြစ်၍ ဆက်တက်မလာရဲသည်ကို မြင်လျင် အတန်ကြာသည်အထိ ထိန်းထားနိုင်ပြီ အထင်ရောက်နေကြလေသည်။

ချီလာသည့် ရေတပ် စစ်ဦးစီးချုပ် ပရင်ဒါဂတ်ကမူ မြန်မာတို့အကြောင်း သိရှိပြီး ဖြစ်သည့်အတိုင်း အနီးအပါး ရွာများသို့ ချက်ချင်းဆင်းကာ ထို ကိုယ်ပျောက်ခံတပ်ကြီးအား အနောက်မှပတ်၍ သွားနိုင်သည့်လမ်းကို ပြပေးနိုင်လျင် ဆုတော်ငွေ ရွှေဒင်္ဂါးများစွာ ချီးမြှင့်မည်ဟု စည်းရုံးလိုက်ရာ ပန်းတော်ပြင်ရွာမှ ဦးရွှေအိုး ဆိုသူ သစ္စာဖောက်တစ်ယောက် ထွက်ပေါ်လာခဲ့လေပြီ။

(ဆက်ရန်...)  ရဲခေါင် (ဇာတ်သိမ်း)

Written by သင်္ခရာဇာ

End date: November 3, 2021