နရဏီ (၁)

ပဉ္စလရာဇ်ပြည်မှ စော်ဘွားတစ်ဦးဖြစ်သူ မိုင်းပင်းစော်ဘွားကြီး အိုက်ရီသည် သမီးဖြစ်သူ နရဏီကို ခေါ်၍ ဤသို့ မှာကြား၏ ။

"တို့ဆီကို ရတနာသိင်္ဃ ဆိုတဲ့ ရွှေဘိုက မြန်မာတပ် တစ်တပ် ရောက်လာလိမ့်မယ်။ သူတို့ဟာ ကျိုင်းတုံအထိ သွားပြီး စော်ဘွားကြီးကို သစ္စာရေတိုက်၊ လက်နက်နိုင်ငံ ပြုဖို့ လာကြသတဲ့။ ဒီတော့ တို့က စုပြီး ပြန်တိုက်ချင်ကြပေမယ့် ကျိုင်းတုံစော်ဘွားက ခွင့်မပြုဘူး။ အချည်းနှီးသာ ဖြစ်လိမ့်မယ် လို့ ဆိုတယ်။ သည် မြန်မာလူစုကို သမီးတော်က ပညာစွမ်းနဲ့ လှည့်ဖျားပြီး တို့နယ်တွေ လက်အောက်ခံ မဖြစ်အောင် စွမ်းဆောင်နိုင်ပါ့မလား"

သမီးတော် နရဏီက ဝံ့ကြွားစွာ ပြုံးလိုက်သည်။

"မြန်မာလူတစ်စုကို မဆိုထားနှင့်၊ မြန်မာဘုရင်ကိုယ်တိုင် ကြွလာရင်တောင် ရှမ်းပြည်ကို မသိမ်းဖို့ သမီးတော် ကြံနိုင်မှာပါ အဖဘုရား၊ စိတ်အေးလက်အေး စောင့်၍သာ ကြည့်ရှုတော်မူပါ"

"သို့ပေမယ့်.. သမီးရဲ့။ တစ်ခု ရှိတာက သည်လူစုကို ဦးဆောင်လာတာက လက်ျာဘီလူး ဆိုတဲ့ ကိုယ်ကြမ်းစိတ်ကြမ်း ဗိုလ်တစ်ဦးတဲ့။ အဲသည်မြန်မာဟာ အလွန်ကောက်ကျစ်ပြီး ရက်စက်ကြမ်းကြုတ်တယ်လို့ နာမည်ကြီးတယ်။ သူ့ကို ကိုင်နိုင်မှသာ အရေးတော် ပြီးပြေ ချောမောလိမ့်မကွဲ့"

နရဏီက အာမခံလျက် စော်ဘွားကို ဖျောင်းဖျခဲ့၏ ။ မြန်မာတပ်၏ သတင်းကိုလည်း အထောက်တော်များနှင့် စုံစမ်းခိုင်းသလို လက်ျာဘီလူး ဆိုသည့် သူအကြောင်းလည်း ခြေမြန်ဆက်သား လွှတ်၍ စုံစမ်းစေလိုက်သည်။

သတင်းတွေကတော့ မွှေးလှသည်။ ဘီလူးစိတ် ဝင်နေသော မြန်မာများသည် ပုန်ကန်ရန် အဟန်ရှိသည့် နယ်စပ် ကျေးရွာတစ်ရွာအား မီးတိုက်ဖျက်ဆီးခဲ့သည်ဟု ကြားသိရ၏ ။ ဆန့်ကျင်ဘက် ပြုသူ မည်သူမဆို မွေးကင်းစ ကလေးငယ်ပါမကျန် ဆွေမျိုးအားလုံး ကွပ်မျက်သည်ဟုလည်း သိရသည်။ သူတို့ ရှမ်းစော်ဘွားတစ်ဦး ကွယ်လွန်လျင် ဇနီးမယား ကျေးကျွန်ပါမကျန် ထည့်မြှပ်ခဲ့ဖူးသည့် အလေ့နှင့်ပင် တူသေးတော့။

ယခုတော့ ရှမ်းပြည်တွင် ထိုဓလေ့ ပျောက်ကွယ်သွားပြီ ဖြစ်သော်လည်း ယင်းဓလေ့အား ဖျောက်ဖျက်ပေးခဲ့သည့် မြန်မာများကိုယ်တိုင်က ထို ရက်စက်ဆိုးရွားသည့် အမူအကျင့်များကို ဆက်ခံနေပါလားဟု သိလိုက်ရသည်။ ထို့ပြင် မြန်မာတပ်သည် ဖြတ်သန်းခဲ့သမျှ ရွာစဉ်မှ ကျွဲနွားရိက္ခာများ အဓမ္မယူငင်လျက် ပဉ္စလရာဇ်ပြည်အား အဆုံးထိ ချီတက် သိမ်းယူဦးမည် ဆိုပါလား။

နရဏီသည် ဉာဏ်ပညာနှင့် ပြည့်စုံသည့်သူ ဖြစ်သည့်အလျောက် ထို မြန်မာတပ်အား မတိုက်ခိုက်ဘဲ မည်သို့ နှိမ်နင်းရမည်၊ မည်ပုံ လှည့်ဖျားလိုက်ရမည်ကို ကြံစည် တွေးတောနေ၏ ။ အဆိပ်ခတ်၍ ငှက်ဖျားမိကြသယောင် သတင်းလွှင့်ရမည်လား၊ မာယာဖြင့် သိမ်းသွင်း၍ အချင်းချင်း တိုက်ခိုက်ပျက်စီးစေလျင် သင့်မည်လား အချိန်ရှိသရွေ့ စဉ်းစားနေရပြီ။

ဆက်သားထံမှ သိရသည့် သတင်းအရ လက်ျာဘီလူး ဟူသည်မှာ ဘုရင်က ပစားပေး မြှောက်စားထားသဖြင့် အရည်အကဲထက် ပို၍ ဝံ့ကြွားနေသော တပ်မှူးတစ်ဦးဖြစ်သည် ဆို၏ ။ သို့သော် ကောက်ကျစ် ဉာဏ်များသည့် နေရာတွင်လည်း နှစ်ယောက်မရှိ၊ သူက မနိုင် နိုင်အောင် အနိုင်ယူတတ်လေ့ ရှိသည် ဟူသော စကားအရ အထူးသတိထားရမည့်သူ ဖြစ်သည်။

အမျိုးသမီးများနှင့် ကင်းကင်းရှင်းရှင်း နေတတ်သည် ဆိုသည်မှာမူ သူ့အကြိုက် ဖြစ်၏ ။ မိန်းမနှင့် ကင်းလေ၊ မိန်းမတွေအကြောင်း မသိလေ ဖြစ်ရာ လှည့်ဖျားရန် လွယ်ကူတတ်သည်။ မာယာဝင်္ကကို တံ့တံ့စားစား ခံနိုင်အား မရှိတတ်။ ငယ်ရွယ် မောက်မာသည်၊ ရဲရင့် ဖျတ်လတ်သည်၊ ခွန်အားကြီး၍ ဘီလူးသဘက်နှင့် အတူဟု ကြားသိရရာ သူ့ကိုပင် ချုပ်ကိုင်နိုင်က လိုသည့်အရေး ရနိုင်မည်ဟု တွက်ဆမိသည်။

အကယ်လည်း ဗိုလ်ချုပ်ပြုလာသော မဟာသေနာပတိက တစ်လမ်း၊ တပ်မှူး လက်ျာဘီလူးက တစ်လမ်း လာကြခြင်း ဖြစ်ရာ ယခု ပင်လယ်မိုင်းမောကြောင်း၌ သူသည်သာ အကြီးဆုံးဖြစ်၏ ။ သူနှင့် တပ်တစ်တပ်သာ လာသည်ကို ကျိုင်းတုံစော်ဘွား၊ ကျိုင်းတောင်းစော်ဘွားများ အဘယ့်ကြောင့် မတိုက်ကြသနည်းဟု တွေးဆ၍ မရ။

စင်စစ် ရှမ်းတို့သည် အင်အားကောင်းကြသည်နှင့်အမျှ တိုက်ရည်ခိုက်ရည်လည်း ရှိကြပါသည်။ ရှမ်းသိုင်းများ၊ ရှမ်းဓားများမှာ အမျိုးစုံသလို အစွမ်းလည်း ထက်ကြသည်။ ယခု တပ်တစ်တပ်စာမျှ မဆိုထားနှင့်၊ မြန်မာဘုရင် တပ်ပေါင်းများစွာနှင့် ချီလာစဉ်ကပင် စော်ဘွားတစ်ဦးမျှ မကျိုးမနွံ ရှိသည်ကို ခဲကပ်စွာ တိုက်ယူရသေးတုံ၏ ။ အခွင့်သာ ရလျင် မိုင်းပင်း (ယခု မိုင်းပျဉ်း) တစ်နယ်တည်းနှင့်ပင် သည်တပ်ကို ခုခံတွန်းလှန်နိုင်စွမ်း ရှိပေမည်။

သို့သော် အဘယ်ကို မြင်၍၊ သို့မဟုတ် အဘယ်ကို ကြောက်၍ စော်ဘွားအများ သစ္စာခံရန် ကြံစည်ကြပါသနည်း။ သူတို့လည်း ပရိယာယ် ပြုကြခြင်း ဖြစ်သလား။ သို့ဆိုလျင် မိမိက တင်ကူး၍ လမ်းမှ ဖြတ်ကာ မြန်မာတို့ကို ဟန့်တားနိုင်ခဲ့လျင် မိမိအမည်သည် ရှမ်းနယ်တစ်လွှား ကျော်ကြားလိမ့်မည်လား ဟူ၍ နရဏီ တွေးနေမိ၏ ။

ထို့ကြောင့် မြန်မာတပ်များ အားလုံးကို လှည့်ဖျား လုပ်ကြံရန်ထက် ပိုမို လွယ်ကူ ထိရောက်မည့် သင်းတို့တပ်မှူးအား ပရိယာယ်ပြုရန်ကိုသာ မဲတင်းနေတော့သည်။ လက်ျာဘီလူး ဟူသည့် လူသွမ်း လာပလေ့စေဦး၊ ငါ့အစွမ်း ကောင်းကောင်း သိရမည်ဟု ကြိမ်းဝါးနေလေသည်။

ဝင်လာကြပြီ ဟူသော သတင်း ကြားသည်နှင့် ဟော်နန်းထက် လေသာပြတင်းမှ မျှော်ကြည့်လိုက်ရာ အင်အား မနည်းလှသည့် တပ်များ ရဲတံခွန် တလူလူ၊ အလံတလွင့်လွင့်ဖြင့် ကျောက်ခင်းလမ်းအတိုင်း ချီလာကြသည်ကို တွေ့ရ၏ ။ ခြေလျင်များ၊ အလံကိုင်များ နောက်မှ မြင်းများစွာလည်း ပါသည်။ စစ်သည်များမှာ အနက်ရောင် မိန်ညိုနှင့် ရွှေရေးကွပ်ချပ်ဝတ်များ ဆင်ထားကြပြီး မိုးနဲရွှေလှံကိုင်များကိုလည်း ဘုရင့်တပ်များကဲ့သို့ မြင်ကြရသည်။

ထို့နောက် တုတ်ရှည်ကြီးများ ကိုင်ဆောင်ထားကြသော တပ်များ၊ ဓားလွတ်ကိုင်သူများ တစ်တန်းကြီး။ ဤအင်အားဖြင့် ရှမ်းပြည်ကို လာသိမ်းဝံ့သတဲ့လား ဟု ထင်မြင်မိရသည်။ သည်တပ်တစ်တပ်ကတော့ နှစ်ရက်ထက် ပိုမတိုက်ရ၊ နတ်ဘီလူးများ မဟုတ်ပါက လူလူချင်း မိမိတို့ မုချ နိုင်သည်ဟူသော အတွေးဖြင့် နရဏီ အတွင်းတော်သို့ ဝင်သွားသည်။

ထောင်စုမှူး လက်ျာဘီလူးသည် မိုင်းပင်းစော်ဘွား၏ အိမ်တော်အတွင်း ဝင်ခဲ့လျက် စော်ဘွားနှင့် တွေ့ဆုံ ပြောဆိုနေကြသည်။ ထိုအချိန်တွင် သူ့ထက် အနည်းငယ် ကြီးမည့် မိန်းမပျိုတစ်ဦး ဧည့်ခန်းဆောင်အတွင်း ဝင်လာသည်ကို တွေ့၍ ပြောလက်စ စကားကို ရပ်ထားလိုက်သည်။ ဝင်လာသည့် အမျိုးသမီးက သူ့အား စူးစမ်းဟန်လည်း ပြုသည်၊ တစ်စုံတစ်ယောက်ကို ရှာဖွေလိုဟန်လည်း ရှိနေလေသည်။

သို့သော် ဘာမှ မမေးမမြန်း၊ သိမ်မွေ့စွာ ဝင်ထိုင်လိုက်သဖြင့် ပြောလက်စ စစ်ရေး ဆက်မရဘဲ ဖြစ်သွားရ၏ ။ စော်ဘွားကတော် တစ်ဦးလား၊ မင်းသမီးတစ်ဦးလား မသိ။ စော်ဘွားကြီး အိုက်ရီက မိတ်ဆက်ပေးပါ၏ ။

"ဒါ ကျုပ်သမီးတော် နရဏီ တဲ့၊ သားယောက်ျား အားထားစရာ မရှိတော့ အစစ သူ့ပဲ ကိုးစားနေရတာပဲ"

သူက ထက်မြက်ဟန်ရှိသည့် အမျိုးသမီးအား တစ်ချက်မျှ ကြည့်ပြီး အသိအမှတ်ပြု ခေါင်းညိတ်ပြလိုက်ကာ လက်ဖက်ရည်ကြမ်းကိုသာ သောက်နေလိုက်သည်။ စော်ဘွားကြီးက သမီးတော်ဘက် လှည့်လျက်

"သူက မြန်မာတပ်များကို အုပ်ချုပ်လာတဲ့ ဗိုလ်မှူး လက်ျာဘီလူး တဲ့"

"ဟင်"

နရဏီ အံ့သြသွားသည်။ သူက ထိုလူငယ်လေးအား အကြိုအထောက် ဗိုလ်တစ်ဦးဟုသာ ထင်ထားခဲ့သည်။ ဗိုလ်မင်းကြီး မလာမီ လုံခြုံရေးအတွက် လာသည့်သူဟု ထင်နေခဲ့ရာ ယခု ထိုကောင်လေးက လက်ျာဘီလူး ဟု သိရသောအခါ ရယ်ချင်သွားသည်။

ဟုတ်လည်း ဟုတ်ပေသည်။ သူ သိထားသည်က ဘီလူးသဘက်နှင့် တူသည် ဟူ၏ ။ ယခု လူရွယ်မှာ သူငယ်တော်နှင့်ပင် တူနေသေးတော့သည်။ သူထင်ထားသည်က အသက် သုံးလေးဆယ်ကျော် လူလတ်ပိုင်း ခက်ထန်ကြမ်းတမ်းသည့် ရုပ်လက္ခဏာနှင့် ဖြစ်ရာ ယခု အသားလတ်လတ်၊ နုနယ်ပျိုမြစ်လှသော ရုပ်ရည်မှာ မည်သို့မျှ ဗိုလ်မှူးတစ်ဦးဟု မြင်၍ မရ။ သူ စစ်တိုက်နေသည့် ဟန်ကို မြင်ယောင်မိလျက် ရယ်ချင်စိတ်ကို မြိုသိပ်ထားလိုက်ရသေးသည်။

"တွေ့ရတာ ဝမ်းမြောက်မိပါရဲ့ရှင်"

ဟု ဆိုလိုက်ရသော်လည်း စိတ်ထဲကတော့ "ဒါလေးက လက်ျာဘီလူး ဆိုတာလား၊ သင်းကလေးတဲ့လား" ဟု တွေးတွေး၍ သူ့ကိုယ်သူ ရယ်ချင်နေလေတော့သည်။

လက်ျာဘီလူးကလည်း သူ့ကိုကြည့်၍ မင်းသမီး ပြုံးစိစိ ဖြစ်သွားသည်ကို မြင်သည်။ သူ့အတွက်တော့ ရိုးနေပါပြီ။ တောရွာရှိ လူကြီးလူငယ်များက အစ နာမည်ကြားပြီးမှ သူ့ကို မြင်လျင် ထိုသို့ပင် ဖြစ်သွားကြလေ့ ရှိသည်မဟုတ်လား။ သူတို့အမြင်တွင် အသက် ၂၀ ပင် မပြည့်တတ်သေးသော လူရွယ်ကလေးမှာ မည်သို့မျှ ခေါင်းဆောင်တစ်ယောက် ဖြစ်လိမ့်မည်ဟု မထင်ကြချေ။

သူက ခပ်တည်တည်ပင် ရေနွေးကြမ်းကို မှုတ်သောက်နေ၏ ။ လူကြီးဟန်ပန်နှင့် ခပ်တည်တည် လုပ်နေသည့် ကောင်လေးကို မြင်လေ၊ နရဏီ ရယ်ချင်လာလေ ဖြစ်သဖြင့် ပြုံးလျက် နှုတ်ဆက်ကာ အဆောင်ခန်းသို့ ပြန်သွားလေသည်။

သလွန်ပေါ် ထိုင်လျက် ပါးစပ်ကို လက်နှင့်အုပ်ကာ တစ်ယောက်တည်း တခွိခွိ ရယ်နေသည့် သူတို့ သခင်မကို ရံရွေတော်များက ဘာဖြစ်လာမှန်းမသိ။ ဘာတွေ သဘောကျလာသလဲ အရှင်မရဲ့ ဟု မေးကြမှ အထင်နှင့် အမြင်ကို ပြောပြ၍ သူတို့ ကြိတ်ရယ်ကြရသည်။

ထိုနေ့ည မြန်မာတပ်များ အားလုံးကို ဟော်နန်းပတ်လည် တပ်ချစေလျက် လက်ျာဘီလူးနှင့် ဗိုလ်များ၊ အရာရှိများအား ညစာ တည်ခင်းဧည့်ခံရာ စော်ဘွား အိုက်ရီက သမီးတော်ကို ပွဲထုတ်လာသည်။ အလှပဆုံး ပြင်ဆင်လာသည့် နရဏီကို မြန်မာတပ်များ၊ အရာရှိ အရာခံများမှ အစ ဝိုင်းကြည့်နေကြရာ နရဏီ၏ အကြိုက်ပင် ဖြစ်နေတော့သည်။

လက်ျာဘီလူးကတော့ တစ်ချက်မျှသာ ပြုံးပြ နှုတ်ဆက်လျက် စော်ဘွားကြီးနှင့် စကားပြောလိုက်၊ သူ့လူများနှင့် ပြောလိုက် လုပ်နေသည်။ မင်းသမီး ဟူ၍ အဖက်မလုပ်သည့်အပြင် အလှအပကိုလည်း ခံစားတတ်ဟန် မရှိ။ ဒါကိုလည်း နရဏီက ပို၍ သဘောကျ၏ ။ သူ အကြိုက်မတွေ့ ဖြစ်ရသည်မှာ လက်ျာဘီလူးနှင့် သူ့လူများသည် သေရည်ကို မည်သို့မျှ တိုက်မရခြင်းပင် ဖြစ်သည်။

နရဏီ၏ စောင်းပညာနှင့် အဆိုကို မြန်မာအားလုံး လက်ခုပ်တီး ချီးကျူးကြရ၏ ။ ထို့နောက် စော်ဘွားကြီးနှင့် သမီးက လက်ျာဘီလူးအား ဟော်နန်းပတ်လည် လှည့်လည်ပြမည်ဟု ခေါ်ရာ အကြပ် ငကံကို ခေါ်လျက် လိုက်လာသည်။ နရဏီက သူ့အား မောင်ငယ်ဟု ခေါ်လျက် ရင်းနှီးမှု ရရန် ကြိုးစား၏ ။ သူက အလိုက်အထိုက်သာ ပြန်ပြော၍ မေးတစ်ခွန်း ဖြေတစ်ခွန်း ရှိသည်။ မကြာမီ စော်ဘွားကြီးက သူငယ်ကို မြင်းစီး လိုက်ပြချေဦးဟု ဆိုသဖြင့် ကွင်းပြင်ဘက် ထွက်လာခဲ့ကြသည်။

(ဆက်ရန်...) နရဏီ (၂)

Written by သင်္ခရာဇာ

End date: July 26, 2021