နွေညမို့ ပူအိုက်လှ၏ ။ သစ်ပင်ငယ်များ၏ အရှေ့ဘက်ရှိ အပူရှိန်သက်သာသော နေရာများ၌ လဲလျောင်းနေကြသည့် အိုးစားဖက်များမှာ ထန်းလက်ယပ်တောင် တဖျပ်ဖျပ်၊ ချွေးတလုံးလုံးနှင့် ရှိနေကြသည်။ အချို့က ပုဆိုးကြမ်းများကို မြေပေါ် ခင်းအိပ်နေကြပြီး အချို့မှာ ခြင်ကိုက်လှသဖြင့် ကိုယ်ပေါ် လွှမ်းထားကြရသည်။
"မအိပ်သေးဘူး မဟုတ်လား သွေးသောက်"
"မအိပ်နိုင်သေးပါဘူးဗျာ.. အိုက်လိုက်တာ လွန်ပါရော၊ လေတစ်ဝှေ့တောင် မတိုက်ဘူး"
"ဟုတ်ပါ့ဗျာ.. ရော့"
ငသူရိန်က နှီးချောယပ်တောင်တစ်ချပ် ကမ်းလိုက်ရာ ငထင် သွက်လက်စွာ ယူ၍ ခတ်လိုက်သည်။
"ခြင်တွေလည်း ပေါလိုက်တာ"
"အေးလကွာ.. ရေမနီး ချုံမနီးနဲ့ ဘယ်ခရီးကနေများ လာကိုက်ကြပါလိမ့်"
"ဒါနဲ့ သွေးသောက်ကြီး ကျုပ်ကို ဟိုတုန်းက အကြောင်းတွေ ပြောပြမယ်ဆို"
"အေး.. ပြောတာပေါ့၊ မင်းက ဘာတွေ နားထောင်ချင်တာလဲ"
ငထင်သည် စကားပြောကောင်းသူ ဖြစ်၍ ပုံပြင်ပြော ဝါသနာပါသူလည်း ဖြစ်၏ ။ သူအပြောကောင်းကြောင်း သိ၍ ငသူရိန်က သိလိုသည့် အကြောင်းများကို လာရောက် မေးမြန်းဦးမည်ဟု စကားခံထားခဲ့ဖူးသည်။
"ကျုပ် နားထောင်ချင်တာလည်း အရင်တုန်းက အကြောင်းတွေပါပဲ၊ သွေးသောက်ကြီး ကိုယ်တွေ့ ဖြစ်ရပ်လေးတွေ၊ တိုက်ပွဲတွေ အကြောင်း၊ တပ်မှူး အကြောင်း.. ဘာဘာညာညာပေါ့"
"ငါကလည်း အဲဒီအကြောင်းတွေသာ ပြောရရင် မစားမသောက်ဘဲလည်း ပြောနိုင်တယ် မောင်"
"ကောင်းပါလေ့ဗျာ.. ကြိုက်ပြီ"
"ကိုင်း.. မေးပေတော့"
ငထင်က ယပ်တောင် ပြန်ကမ်းပေးလိုက်သဖြင့် ငသူရိန် ယူ၍ ခတ်ရင်း
"သွေးသောက်ကြီးက ပထမဦးဆုံး ဘီလူးတပ်သားဆို"
"အေး.. ငါတို့ အဖွဲ့တွေပေါ့ကွယ်။ ငထင်၊ ငမြတ်ကျော်၊ ငသာဒွန်းအောင်၊ ငရွှေလူ၊ ငတောက်ထွန်း၊ ငတက်တူ၊ ငတက်ခါး.. နောက် အများကြီးပေါ့။ တို့အသုတ်က တော်တော်များများတော့ သေကုန်ကြပြီကွဲ့"
"အိုးစားကြီး ငတက်တူတော့ ကျန်သေးသား"
"ဟုတ်ပ၊ သူ့အစ်ကို ငတက်ခါးက အင်းဝပွဲမှာ ကျသွားတာ"
"ကျုပ်ကို ဘီလူးတပ်သား ဖြစ်လာပုံက စပြောပြဗျာ"
"ဒီလိုကွ.. အစကတော့ ငါတို့ ဝင်တုန်းက ဘီလူးတပ်သား အဖြစ်နဲ့ မဟုတ်ဘူး။ မင်းတရားကြီး ဖြစ်လာမယ့် သူကြီး ကိုအောင်ဇေယျထံ ခိုဝင်ကြတာပဲ"
ငထင်တို့ ရွာသား တစ်ကျိပ်နှစ်ယောက်သည် မုဆိုးဘိုရွာ အနီးရှိ ရွာတစ်ရွာမှ ဖြစ်ပြီး အင်းဝကို မွန်တို့ သိမ်းလိုက်သောအခါ ဘုန်းလက်ရုံး တောက်ထွန်းနေသော ဦးအောင်ဇေယျ၏ စုစည်းမှုအောက်သို့ အတူတကွ ဝင်ရောက်လာကြသူများ ဖြစ်သည်။ သူတို့ရောက်ပြီး နောက်မှ ဗိုလ်တွန်တို့ မုဆိုးခြုံရွာသားတစ်သိုက် ခိုဝင်လာကြ၏ ။
သူတို့ ရောက်စဉ်ကမူ ယခု တပ်မှူး ဖြစ်နေသော လူငယ်ကလေး လက်ျာဘီလူးပင် မရောက်သေးဘဲ ဦးကောင်း၏ ဦးဆောင်ကွပ်ကွဲမှုအောက်မှ လိုက်ပါ တိုက်ပွဲဝင်ခဲ့ကြသည်။ မွန်တို့ကို မုဆိုးဘိုမှ စတင် ခုခံကြချိန်အထိ လက်ျာဘီလူးကို မသိသေး။ ခင်ဦးတပ်ကို တိုက်ခါနီးတွင် မင်းတရား၏ အသက်ကို ကယ်လိုက်သည့် လူငယ်တစ်ဦးအကြောင်း စကြားဖူးခဲ့ရသည်။
သူတို့သည် တိုက်ပွဲများတွင် ရွပ်ရွပ်ချွံချွံ တိုက်ခိုက်ကြပါ၏ ။ သူနှင့်အတူ ပါလာသော ရဲဘော်များ ကျဆုံးကုန်သော်လည်း ငထင်တို့သည် မိမိတို့အသက်ကိုပင် အလေးမထားဘဲ တိုက်ခိုက်ကြမြဲ။ တိုက် ဆိုသည်နှင့် ဝံ့ဝံ့စားစား ထိုးခုတ် တိုးဝင်ကြသည်ချည်း ဖြစ်သည်။ နိုင်တစ်ခါ ဆုတ်တစ်လှည့်ဖြင့် တိုက်ပွဲများစွာ တိုက်ခိုက်ပြီးသောအခါ လက်ျာဘီလူးသည် သူတို့လူဟောင်း သူရဲကြီးများကို ကျော်လျက် နာမည်ထွက်လာတော့သည်။
ငထင်တို့ အရည်အချင်း ညံ့ဖျင်းသောကြောင့် မဟုတ်၊ သင်းက ပိုမိုပေါ်လွင်စွာ တိုက်ခိုက်တတ်ခြင်းကြောင့် ဖြစ်သည်။ ငထင်တို့မှာ ကြောက်ရွံ့ နောက်တွန့်တတ်သည်မဟုတ်သော်လည်း သင်းက ပို၍ သွေးအေး ရက်စက် ကြမ်းကြုတ်တတ်၏ ။ ငထင်တို့က ရှေ့တန်းမှ သက်စွန့်ကြိုးပမ်း လုပ်ကြံနေချိန်ဝယ် သင်းက ရန်သူ့နောက်တန်းအထိ မွှေနှောက် ထိုးဖောက်ခြင်းမျိုး မကြာခဏ လုပ်တတ်သည်။
မကြာမီ လက်ျာဘီလူး ဗိုလ်ဖြစ်လာပြီး ငထင်က သူ့လက်အောက်သို့ အိုးစားကြီးအဖြစ် ရောက်သွားရ၏ ။ ထိုအခါမှ သင်းအကြောင်းကို ပို၍ သိရ၏ ။ ကောင်ကလေးပါဟု မခန့်လေးစား မလုပ်ဝံ့လောက်အောင် ယင်းသူငယ်သည် တည်ကြည်အေးစက် ခက်ထန်လှပေသည်။
ငမြတ်ကျော်၊ ငတက်တူတို့မှာ မင်းလှမင်းခေါင် ဦးကောင်းတပ်သို့ ပါသွားပြီး လူစုကွဲသွားသည်။ ငရွှေလူမှာမူ ပထမဆုံး မွန်တို့နှင့် တိုက်ပွဲဖြစ်ပွားသော မုဆိုးဘိုပွဲတွင်ပင် ကျဆုံးသွားပြီး ငသာဒွန်းအောင်တို့လည်း စစ်ကိုင်း၊ ခင်ဦးတိုက်ပွဲများ၌ အသက်စွန့်သွားကြရ၏ ။
ထို့နောက် သူတို့တပ်သို့ အကြပ် ငကံတို့ ရောက်လာကြပြန်သည်။ ငကံမှာ တပ်ပြောင်းလာသူဖြစ်ပြီး အဘမျှင်သည် ဝေးလံခေါင်သီသော အရပ်မှ မျက်စိလည်လာခြင်း ဖြစ်သည်ဟု ဆို၏ ။ နောက်ဆုံးတွင်မှ သူရိန်တို့ ၅ ဦး ဝင်လာကြခြင်း ဖြစ်သည်ဟု သွေးသောက်ကြီး ငထင်က ရှင်းပြလေသည်။
"ဒါဆို သွေးသောက်နဲ့ တစ်ချိန်တည်း ဝင်ခဲ့တဲ့အထဲက ဘီလူးတပ်သား ဖြစ်လာတာ ဘယ်သူတွေ ကျန်သေးလဲ"
"အဲ.. ငါရယ်၊ ငခက်ရယ်၊ ငတုတ်ရယ်၊ မောင်မောင်ကိုးရယ်.. ဒီကောင်တွေက တို့ရွာကတော့ မဟုတ်ဘူးကွ။ အလည်ရွာတို့၊ စဉ့်ကိုင်တို့ဘက်က လူတွေ။ ငါနဲ့ ရှေ့ဆင့် နောက်ဆင့် ဝင်လာပြီး တပ်မှူး လက်အောက် ရောက်လာခဲ့သူတွေကို ပြောတာ"
"ပြီတော့ရော၊ ဘီလူးတပ်သား လို့ ဘယ်လို ဖြစ်လာသလဲ။ ဘယ်လိုတွေ ကြုံခဲ့ကြရသလဲ လင်းပါဦးဗျ"
ငထင်က ဦးခေါင်းပြောင်ပြောင်ကို တဘက်ဖြင့် သုတ်လိုက်ပြီး
"တကယ်တော့ ဘီလူးတပ်ဆိုတာ ငါတို့ အချင်းချင်း ပေးတဲ့ အမည် မဟုတ်ဘူး မောင်၊ ကောလာဟလတွေ ကြားပြီး လူတွေက ခေါ်ကြတာတဲ့။ အဲဒီကနေ တခြားတပ်တွေကပါ လိုက်ခေါ်ရင်း တွင်သွားတာ"
"ဟုတ်ကဲ့၊ အဲဒီအမည် ဖြစ်ပေါ်လာပုံကလေးရော ဇာတ်ကြောင်းလေးနဲ့ လုပ်ပါဦး"
"ငါတို့ တပ်မှူးက သူ့တပ်လို့ သတ်သတ်မှတ်မှတ် ဖြစ်လာတာနဲ့ တခြား တပ်တွေနဲ့ မတူတဲ့ အလုပ်တွေ စလုပ်ခိုင်းတော့တာကိုး။ ငါတို့မှာ ညကြီးသန်းခေါင်လည်း ထပြီး စစ်ဆင် စစ်တက် လေ့ကျင့်လား လေ့ကျင့်ရရဲ့၊ သူများတွေ နားနေတုန်း ရေကူးကြရမယ်၊ လှေလှော်ရမယ် ဆိုတာမျိုးလည်း လုပ်ကြရရဲ့။ သို့ပေမယ့် စောဒက မတက်ဝံ့ဘူး။ သူခိုင်းတာ မလုပ်ချင်ရင် ချက်ချင်း ထုတ်ပစ်တာ၊ ဒဏ်ပေးတာ၊ အိမ်ပြန်ခိုင်းတာမျိုး လုပ်တတ်တာကွ"
ပြောရင်း ငထင်က လေသံကို နှိမ့်၍
"တို့တပ်မှူးက စိတ်သိပ်မှန်တာ မဟုတ်ဘူး။ သိတယ် မဟုတ်လား"
ငသူရိန် ပြုံးလိုက်သည်။ ပြန်တော့ မဖြေ။
"တစ်ခါတလေတော့ ချစ်ဖို့ ကောင်းပါတယ်၊ ဒါပေမယ့် ကြောက်ရတဲ့ အချိန်က များတယ်လေ။ ဒါကလည်း သူ့ကို ကလန်ကဆန် လုပ်ရင်သာ သူ ဘာလုပ်မလဲ တွေးကြောက်နေရတာ။ သူ ပြောသလိုသာလုပ် ဘာပြဿနာမှ မရှိဘူး.. ဘေးကင်းတယ် ဆိုတာ တို့အားလုံး သိပြီးသားပဲ မဟုတ်ဘူးလား"
ငသူရိန် ခေါင်းညိတ်၏ ။
"သူက အကြံအစည်များပြီး ခေါင်းထဲပေါ်တာကို အချိန်မဆိုင်း ချက်ချင်း ထလုပ်တတ်လို့ နေမှာပါ။ ဒီတပ်မှာ နေရတာ နည်းနည်း ပင်ပန်းပေမယ့် လွတ်လပ်ပြီး ပျော်စရာ ကောင်းပါတယ် ကိုကြီးထင်"
"မပျော်လို့ ပြောတာ မဟုတ်ပါဘူး၊ မင်းတို့လည်း ဘီလူးတပ်သား ဖြစ်ချင်လို့ကို ရအောင် ဝင်လာခဲ့တာ ငါအသိသားပဲ။ ဒါနဲ့ နေပါဦး၊ ငါ ဖြတ်မေးပါဦးမယ်။ မင်းတို့ကရော တို့တပ်ကို ဘယ်လို သိထားခဲ့တုန်း။ ရွာမှာ ဘယ်လိုတွေ ကြားဖူးခဲ့တုန်း မေးတာ"
"ကျုပ်တို့ကတော့ဗျာ၊ အရွယ်ရောက်လာရင် မင်းမှုထမ်းမယ်၊ စစ်သည်ကျော်ကြီးတွေ ဖြစ်ရမယ်လို့ စိတ်ကူးယဉ်ခဲ့ကြသူချည်း မဟုတ်လား။ ဒီတော့ စစ်ပွဲ သတင်းတွေ ကြားရချိန်မှာ ကျုပ်တို့ သဘောကျတဲ့တပ်၊ အံ့သြစရာ ကောင်းတဲ့တပ်မျိုးကို ဝင်ချင်ကြတာပေါ့။ အဲဒီအထဲက တစ်ခါတစ်ခါ ကြားရတတ်တဲ့ ဘီလူးတပ် ဆိုတာကို စိတ်ဝင်စားမိခဲ့ကြတာပါ"
"အေး.. ဘယ်လိုတွေ ကြားရလဲ။ ငါတို့တွေ သိပ်စွမ်းတာပဲ တဲ့လား.. ဟဲဟဲ"
"အဲဒီလိုတော့ ဘယ်ဟုတ်မလဲ၊ အဲသလိုမျိုးပေါ့။ တစ်ခါဆို ဆိုသလောက် ကြားရတာ အားရစရာကြီးပဲ။ လူငယ်တွေအတွက်တော့ ဘီလူးတပ် ဝင်စီးပုံမျိုး၊ မဖြစ်နိုင်တာကို တိုက်သွားကြပုံမျိုး ကြားရတာ ကြက်သီးတဖြန်းဖြန်း ထပြီး အံကြိတ် နားထောင်ရတာပ"
"ဘီလူးတပ်သား သွေးသောက်ငထင် အကြောင်းရော ပါသေးလားကွ"
သူတို့ဘေးဘက်တွင် တစ်ဖက်လှည့် အိပ်နေသော အိုးစားကြီး ငမှတ်က ရုတ်တရက် ကိုယ်ကို လှည့်လိုက်ပြီး
"ဟေ့လူ၊ ငြိမ်နားထောင်နေတာ အကောင်းမှတ်နေလား။ တယ် နားကလောလိုက်လေခြင်းဗျာ၊ ခင်ဗျား ဆက်မေးမယ်ဆို ကင်းပဲ သွားစောင့်တော့မယ်"
"ဟ ဟ ဟ ငမှတ်ရ၊ မနာလို မဖြစ်ပါနဲ့ဟ။ သွေးသောက်ငထင်တို့ သတင်းကြီးတဲ့ အကြောင်းလေး နားထောင်သွားပါဦး။ နောက်မှ လေးစားကြည်ညိုလွန်းလို့ ထိုင်ကန်တော့ပါရစေဆို ငါက တော်ရုံ လက်ခံတတ်တာ မဟုတ်ဘူးကွဲ့"
"ဟယ်.. ရာရာစစ၊ တော်စမ်း။ ကျုပ်သွားပြီဗျ။ အိုက်ရတဲ့အထဲ.."
ငမှတ်က ထမည့်ဟန် လုပ်၏ ။ ငထင်က ဆွဲမည့်ဟန် ပြင်ပြသည်။ တကယ်မထသလို တကယ်လည်း မဆွဲ၊ ထိပင် မထိကြပါ။ သူရိန်က သူတို့ စနောက်နေသည်ကို ကြည့်ရင်း
"ကျုပ် သဘောကျတာ အဲဒီလို ချစ်ချစ်ခင်ခင်နဲ့ အမုန်းမပွားအောင် ထိန်းထိန်းသိမ်းသိမ်း စနောက်ကြတာလည်း ပါတယ်ဗျ။ တစ်နေ့က ဦးရွှေရည်တပ်မှာ အချင်းချင်း နောက်ပြောင်ရင်း ထဆော်လိုက်ကြတာ ကွဲကြ ပြဲကြလို့ အချုပ်ထဲ ရောက်သွားတယ် ကြားပါရော"
"တို့တပ်မှာ ဒါမျိုး လုပ်ကြည့်ပါလား။ (လေသံဖြင့်) တပ်မှူးက စိတ်မထင်ရင် မထင်သလို ထသတ်မှာဟ။ အချုပ်တွေ ဘာတွေ ခန့်မှန်းကြည့်လို့ ရတာမျိုး မဟုတ်ဘူး"
"တစ်ခါတလေ နပမ်းထလုံးတာကို သူကတောင် လာအားပေးနေသေး မဟုတ်လား"
"မင်းမသိလို့၊ တစ်ခါသား အဲလိုပဲ တစ်ပုံစံတည်း ဖြစ်ပြီး လုံးတုန်းက နှစ်ယောက်စလုံးကို ကြိုးတုပ်ပြီး မြစ်ကမ်းပါးက ကန်ချလိုက်တာ ဘယ်သူမှ လိုက်မဆယ်ရဲဘူး။ ကံကောင်းလို့ မသေတယ်"
ငမှတ်ကလည်း..
"ဟိုအကောင် ငကျော်ကြား လောင်းကြေးစားကြေးနဲ့ ညဘက်ခိုးထွက်ရင် ထိပ်တုံးတစ်ရက်ပဲဆိုပြီး ထွက်ပြတုန်းက ဘယ်လို ဒဏ်ပေးတယ်မှတ်သလဲ သိလား ငသူရိန်"
"မသိဘူးဗျ.. ကျုပ်တို့ မရောက်သေးဘူး"
"၇ ရက်တိတိ ညဘက် တခြားတပ်တွေကို လှည့်ပြီး ဓားကောင်း ဝင်ခိုးခိုင်းသတဲ့။ မိရင် ကိုယ့်ဘာသာ ခံရမတဲ့။ သူက ဒဏ်ပေးလို့ ခိုးရကြောင်း ပြောရင် လျှာကို ဖြတ်မယ် ဆိုလို့ ငါတို့မှာ ညတိုင်း အသည်းတယားယားနဲ့ကွာ"
"အခုကျ သင်း ဘာမှ မဖြစ်ပါလား"
"ဘယ်ဖြစ်မလဲ၊ ဒီကောင်က စောရနက္ခတ်နဲ့ မွေးတဲ့ကောင်ပဲ။ ၇ ရက်စေ့လို့ တပ်မင်းကြီးတွေရဲ့ ဓားတွေကို ပြန်လိုက်ပေးရတော့မှ အားလုံး ဒေါသထွက်ရအခက် ချီးကျူးရအခက် ဖြစ်ကုန်ကြတာပေါ့။ တကယ့်ဟာတွေကွ.. တို့တပ်က။ ပေါက်ပေါက်ရှာရှာချည်း စုထားသလား မှတ်ရ"
ငသူရိန် ရယ်သည်။ သူ သဘောကျတာလည်း ဒါမျိုးတွေပဲ ဖြစ်၏ ။ ဤတပ်တွင် လူတိုင်းသည် အစွမ်းအစ တစ်မျိုးစီနှင့် ဖြစ်သလို ထိုသူများ အတူတကွ စုဖွဲ့ကြသောအခါ၌လည်း မထင်မှတ်လောက်အောင် စည်းလုံးညီညာ၍ ဖြိုခွဲရန် ခက်လှသော အသိုက်အဝန်းကြီး ဖြစ်လာလေသည်။
"ကိုရင်သူရိန်တို့ ကြားရပုံလေး ဆက်ပါဦး"
"သြော်.. ရွာကို ရောက်လာတဲ့ သတင်းတွေထဲ ထင်ရှား စိတ်ဝင်စားစရာ ဖြစ်နေတာမျိုးပါ။ တခြားသူတွေက မြောက်က တိုက်ရင် ဘီလူးတပ်က တောင်ကဝင်တယ် ဆိုတာမျိုး၊ နိုင်နေတုန်း ပြန်ဆုတ်သွားလို့ ရန်သူတွေ အားတက်ပြီး လိုက်ထပ်လာတော့ နောက်တပ်မကြီးနဲ့ တွေ့ပြီး စိစိညက်ညက် ကြေကုန်တာမျိုးက အတော် သဘောကျစရာဗျ။ ကြားလိုက်ရရင် အဆန်းတွေ၊ အဲဒါမျိုးကို ကိုယ်တွေ့ ကြုံချင် မြင်ချင်လာတယ်။ မိန်းမသားတွေတောင် အဲဒီအထဲ ကိုယ်တိုင် ပါဝင်ချင်လာတာ တဲ့"
"ဘယ်ထဲလဲကွ၊ ငါတို့ထဲလား.. ဟိဟိ"
"ထူးထူးခြားခြားတွေ လုပ်ကြံကြတဲ့ အထဲကို ပြောတာပါဗျာ၊ သွေးသောက်ကြီးကလည်း"
"တို့ထဲ ပါလို့ကတော့ သူရဲကောင်း ငထင်ဆိုတာနဲ့ နဖူးတွေ့ ဒူးတွေ့ တွေ့သွားမှာပေါ့ကွယ်"
ဟင် ဟု ဆို၍ ငမှတ် တစ်ဖက်သို့ ဟန်ပါပါ လှည့်သွားသည်။ နားထဲကိုလည်း လက်နှိုက်လိုက်သေး၏ ။ ငထင်က အကြီး ဖြစ်နေ၍ မပြောသာသော်လည်း အမူအရာနှင့် လှောင်ပြောင် စနောက်နေလေသည်။ ငထင်ကတော့ ဂရုမစိုက်၊ တမင် လေသံကို မြှင့်လျက်
"နောက်မှ ရောက်တဲ့ ကောင်တွေက မနာလို ခံရတာလည်း ငထင်တို့အဖို့ ရိုးနေပါပြီလေ၊ သူရဲကောင်းဆိုတာက ဒီလိုပဲ မဟုတ်လားကွ.. ငသူရိန်"
ငသူရိန် သတိရသွားသည်။
"အဲ.. အဲ၊ သူရဲကောင်း ဆိုမှ.. တိုက်လှေကြီးတွေကို ရဲလှေတွေနဲ့ ဝင်တိုက်ကြတော့ရော ကိုကြီးထင် ပါသေးလား၊ အဲဒီအကြောင်း ကြားချိန်က စပြီး ကျုပ်တို့ ဘီလူးတပ်ရဲ့ အမာခံပရိသတ် ဖြစ်လာကြတာပဲ"
"ဟာ.. ပါပြီလားကွာ။ ငါ သွေးသောက်ကြီး ဖြစ်လာစေတဲ့ ပွဲပဲ။ အဲဒီပွဲမှာ ငါတို့ တစ်ဖွဲ့လုံး.. မင့်တပ်မှူးက လွဲလို့ အကုန် ရာထူးတွေ ခုန်တိုးကုန်တာ၊ ငါဆို အိုးစားကြီးကနေ သွေးသောက် ဖြစ်သွားတယ်။ ငကံက အကြပ် ဖြစ်လာတယ်။ ငါတို့တပ်လည်း ဘီလူးတပ်ဆိုပြီး နာမည်ထွက်လာတယ်။ အဲ.. ရာထူးချခံရပြီး အဆောင်အယောင် ဘွဲ့ အစီးအနင်းတွေ သိမ်းခံရတာ ဆိုလို့.."
ပြောရင်း စိတ်မကောင်းဟန်ဖြင့် ခေတ္တ ငြိမ်သွားသဖြင့် ငသူရိန် စိတ်ဝင်စားသွား၏ ။
"လက်ျာဘီလူး တစ်ယောက်ပဲ ရှိတယ်ကွဲ့"
"သူကျ ဘာလို့ ရုတ်သိမ်းခံရတာလဲ။ ဒီလောက် ကြီးတဲ့ ပွဲရတာကို၊ တခြားသူတွေလည်း ပွဲရလို့ ချီးမြှောက်ခံရတာပဲလေ"
"မသိကြလို့ပေါ့ကွယ်။ သူ ဘယ်လို လုပ်သွားသလဲ ဆိုတာ ငါတို့ကလွဲပြီး ရွှေနန်းရှင်ကအစ ဘယ်သူမှ နားမလည်တော့ အမိန့်မနာခံမှု၊ စိတ်ထင်ရာ တဇွတ်ထိုး လုပ်မှုတွေနဲ့ ၃ ရက် နေလှန်းခံရတယ်။ ၇ ရက် အကျဉ်းကျတယ်။ တုံးနဲ့ နေရတယ်။ ပြန်ထွက်လာတော့ ကင်းရှည်ထွက်ရတာ နန်းတော်နားတောင် မသီရတော့ဘူး"
ငထင် ပုံစံက တကယ် ကရုဏာသက်နေဟန် ပေါ်သဖြင့် ငသူရိန် သိချင်စိတ်ကို ထိန်းပြီး တဖြည်းဖြည်း ပြောသည်။
"ကျုပ်တို့ ကြားရတာကျ သူရဲကောင်း လက်ျာဘီလူး ဆိုတာ ကင်းစမ်းလှေလေး ၃၀ တည်းနဲ့ မြစ်ပြင်ပြည့် ပိတ်ဆို့ထားတဲ့ တိုက်လှေကြီးတွေကို တက်တိုက်ပစ်လို့ လှေကြီးတွေ ပျက်ပြီး မနည်း ပြေးရတယ် ကြားတာကိုး။ တကယ်မဟုတ်ဘူးတောင် ထင်ခဲ့ကြရတာ"
"တကယ်ပါပဲ.. စိတ်ချလက်ချကို ယုံယုံကြည်ကြည်နဲ့ တိုက်ခဲ့တာကွဲ့။ တို့လည်း အစကတော့ ဇဝေဇဝါပေါ့။ နောက်တော့ ဘုရင့်နောင် ဖောင်ဖျက်တာထက် ဆိုးတဲ့ သူ့စကား နားယောင်ပြီး ခပ်ရဲရဲ လုပ်ကြတော့တာပဲ"
"ဘယ်လိုမှ မဖြစ်နိုင်ဘူးလို့ မထင်ဘူးလား"
"လူတိုင်း အဲသလို ထင်မိကြမှာပဲလေ။ ငါတို့လည်း မြင်မြင်ချင်း သည်လိုပဲ ထင်မိရတာပ။ ဘယ်ကွာ.. သင်းက နိုင်ကို နိုင်မှာ တဲ့။ တိုက်လှေကြီးတွေကို အခွာမခံနဲ့တဲ့ကွ။ မင်း ကြားဖူးလား၊ အမြောက်ကြီးတွေနဲ့ ချိန်ထားတဲ့ သောင်းတပ်ကြီးကို လူ ၅၀၀ မပြည့်တဲ့ လှေတပ်ကလေးက ကြိမ်းဝါးသံယံပြီး.. ဘာတဲ့၊ လှေ ၃၀ ဆိုတာ လူ ၃၀ မဟုတ်ဘူးတဲ့၊ ငါတို့မှာ လူတွေ အများကြီး ရှိတယ်.. သင်းတို့ တိုက်လှေတွေကို ရအောင် ယူကြမယ်၊ မပြေးစေနဲ့လို့ အမိန့်ပေးတာမျိုး"
"အစကတော့ မယုံချင်ဘူး။ သည်ရောက်တော့ ကိုယ်တိုင် မြင်ရတော့လည်း ယုံရတာပဲ"
"အေး.. ဟိုးမှာကြည့်စမ်း"
ငထင်က တောင်ကုန်းတစ်နေရာမှ မီးရောင်လက်လက်ကို ပြသည်။
"သူ အဲဒီ တောင်တွေကို ကြည့်ပြီး ငေးနေတာ ထင်လား"
ငသူရိန် ဖြေသည်။
"တစ်ခုခု ကြံနေတာ နေမှာပေါ့"
"ဒါပဲပါ့။ စစ်ချီနေတုန်း သူ့မြင်းရပ်သွားရင် တစ်ခုခုကို တွေ့လို့ အသုံးချတော့မယ်မှန်း လူတိုင်း သိတယ်။ တစ်နေရာမှာ တစ်ခုခုခိုင်းတာနဲ့ အဲဒါက နောက်ပွဲမှာ ဘယ်လို ပါလာမလဲပဲ စောင့်ကြည့်ရတော့မယ်။ လမ်းမှာ တစ်ဖက်ရပ်တဲလေး တွေ့လို့ ဝင်သွားပြီး ပက်လက်လှန်နေပြီဆို မနှောင့်ယှက်မိစေနဲ့၊ ဆင်ကြံကြံနေပြီပဲ"
ပြောရင်း ဟက်ခနဲ တစ်ချက်ရယ်၏ ။
"မသိတဲ့ သူတွေကတော့ ပေါ့လွန်းတယ်၊ ရဲလွန်းတယ်၊ ရူးလွန်းတယ် မြင်ကြမှာပဲ။ ငါတို့ကတော့.."
ငထင်ဖြတ်ထားသော စကားကို ငသူရိန်က ဆက်ပေး၏ ။
"သတိထားလွန်းတယ်၊ အပင်ပန်းခံလွန်းတယ်ပေါ့။ ဟုတ်လား"
"မပြောတတ်ပါဘူးကွာ"
လေပြည်တစ်သုတ် ရိပ်ခနဲ ဖြတ်ပြေးသွားသဖြင့် အဖိုးတန်လိုက်တဲ့ လေလေးဟု ရေရွတ်သံတို့ ကြားရသည်။ ငသူရိန်က ကျောက်တုံးပေါ် တဘက်ခုကာ ခေါင်းတင်လိုက်ရင်း
"တပ်မှူးကို သူရဲကောင်း လက်ျာဘီလူးလို့ ဖြစ်လာစေတဲ့ အဲဒီတိုက်ပွဲအကြောင်းလည်း အသေးစိတ် ပြောပြဗျာ။ သူ ဘယ်လို ဘယ်ပုံ တိုက်သွားသလဲ သိချင်နေပြီ"
ငထင်က သံရှည်ဆွဲလိုက်၏ ။
"အင်း"
No comments:
Post a Comment