ကြောက်သောသူ

တပ်မှူးကြီး ဘယကျော်ခေါင်၏ မျက်နှာမှာ အလိုမကျမှုကြောင့် တင်းမာနေသည်။ သူ့မျက်နှာရိပ်ကို ကြည့်နေကြရသော တပ်မှူးငယ်များ ရဲမက်စစ်သည်များမှာ နေစရာ မရှိတော့။ အကယ်စင်စစ် မည်သူ့အပြစ်မှ မဟုတ်မှန်းလည်း သိကြသည်။ အဘယ်အကြောင်းကြောင့် တပ်မှူးကြီး မကျေမနပ် ဖြစ်နေရသည်ကိုလည်း သိကြသည်။ သူတို့နှင့် မဆိုင်သော်လည်း အာဏာပြင်းသော ဘယကျော်ခေါင် မျက်နှာညိုပြီဆိုလျင် အောက်လက်ငယ်သားများ အလိုလို ဒူးတုန်နေကြသည်။

တကယ်တော့ တရားခံက လက်ျာဘီလူး ဆိုသည့် တပ်မှူးတစ်ယောက်၊ သို့သော် ဘယကျော်ခေါင်နှင့် မည်သို့မျှ ဆက်စပ်နေသည်လည်း မဟုတ်။ ဘယကျော်ခေါင်အား အပြစ်ပြုဖူးသည်လည်း မရှိ။ သို့သော် လက်ျာဘီလူး၏ အပြူအမူများက ဘယကျော်ခေါင်၏ သည်းခံနိုင်အားကို လွန်မြောက်နေပေပြီ။

ကြည့်လေ…၊ ဘယကျော်ခေါင်တို့၏ စစ်သူကြီး နေမျိုးသီဟပတေ့ အပါအဝင် မင်းသား မှူးမတ်အားလုံးက ဖိန့်ဖိန့်တုန်အောင် ကြောက်ရွံ့ ခန့်ညားရသော ဘဝရှင် ဆင်ဖြူရှင် မင်းတြားကြီးကို လူပုံအလယ်တွင် မခန့်လေးစား လုပ်သွားခဲ့သည်။ ရေမြေ့ရှင်က ကြည့်လိုသည်ကို ကပျက်ကချော် လုပ်သည်။ ဘုရင်က ပေးသည့်တာဝန်ကို ငြင်းပယ်ရဲသည်။ ဆင်ဖြူရှင် မြေဒူးမင်းကြီးကိုပင် ချက်ကျလက်ကျ ပြန်ပြောသွားလိုက်သေးသည်။

အခြားသူ တစ်ဦးဦးဆိုပါက သေချာပေါက် နေရာတွင်ပင် အကွပ်ခံရပေလိမ့်မည်။ အမတ်ပါးဝနေသော မှူးကြီးမတ်ရာများ အနေဖြင့် ဆင်ဖြူရှင်၏ ခက်ထန်သော သဘောတော်ကို အပ်ကျမတ်ကျ သိကြပြီး ဖြစ်သည်။ မည်သူက မည်သည့်စကားမျိုး လျှောက်လျင် မည်သည့်အပြစ် ပေးခံရမည်၊ ဤစကားကတော့ အကွပ်အညှပ်ခံရမည်၊ ဤအဆိုကား အရေခွံနွှာခြင်းနှင့် ထိုက်တန်သည်၊ ဤတစ်ခွန်းမှာ ကားစင်နှင့် သင့်လျော်သည်၊ ဤအပြောကတော့ အပေါင်အလက်ကို ဖျက်၍ အသတ်ခံရလိမ့်မည် ဟု သိနေကြသူများဖြစ်သည်။

လက်က်ျာဘီလူးက မင်းတြားကြီး ပေးအပ်သော ကိုယ်ရံတော်ရာထူးကို ငြင်းပယ်လိုက်သောအခါ အားလုံး ထိတ်လန့်သွားကြသည်။ ဝင်းမှူးအထိ ဖြစ်နိုင်သော အခွင့်အရေးကို လက်လွှတ်လိုက်ရုံမက တင်းမာခက်ထန်လွန်းသည့် ဆင်ဖြူရှင်၏ ဓားစက်အောက် ခေါင်းလျှိုးဝင်လိုက်ခြင်းလည်း ဖြစ်၏ ။ သို့သော် ထုံးစံအတိုင်း လက်ျာဘီလူး အကွပ်မခံရ။ အလောင်းမင်းကြီးလူ ဖြစ်နေသဖြင့် သားတော်မင်းတရားက ခွင့်လွှတ်ပေခြင်းလော၊ အလောင်းမင်းတရားနှင့် ကတိထားခဲ့ကြသည့်အတိုင်း မင်းမိန့်ဖြင့် မသေစေရ ဟု သဘောတော် ပိုက်ထာသောကြောင့်ပေလော၊ ဆင်ဖြူရှင်သာ သိပေမည်။

ဘယကျော်ခေါင်ကတော့ သည်အကောင်ကို သေစေချင်လှပြီ။ အလောင်းမင်းကြီးလူ ဟူ၍ လူပါးဝလှသည်။ မည်သူ့ကိုမှ လူမထင်သည်မှာ ဘဝရှင်ပင် ပါလိုက်သေးသည်။ တကယ့်အကောင်၊ ခမည်းတော်ဘုရား ရှိစဉ်ကတည်းက အမိန့် မလိုက်နာ စိတ်ထင်ရာ အရမ်းလုပ်တတ်သည် ဟု ဆိုကြသည်။ သည်လိုအကောင်ကို ဘဇာကြောင့် ပိုးမွေးသလို မွေးထားကြရသနည်း။ ကုန်းဘောင်နေပြည်တော်တွင် သူ့ထက်သူ သူရဲ သတ္တိကောင်းများ များစွာရှိပါသည်။

ဘယကျော်ခေါင်မှာ ဆင်ဖြူရှင်မင်း လက်ထက်တော်မှ တစတစ ရာထူးတိုးပြီး တပ်မှူးကြီး ဖြစ်လာရသော်လည်း ထွားကျိုင်းသန်မာပြီး အရည်အချင်းရှိသူ ဖြစ်သဖြင့် တပ်မှူးအများကို အုပ်ချုပ်ရသူ ထောင်စုမှူးကြီး ဖြစ်နေသည်။ လက်ျာဘီလူးမှာမူ ယခင်ခေတ်က လူ နှစ်ထောင် သုံးထောင် အုပ်ချုပ်ခဲ့ရဖူးသည် မှန်သော်လည်း ယခု မင်းမှုပြန်ထမ်းသောအခါ လူငါးရာကျော်ကိုသာ ကွပ်ကဲရသူ တပ်မှူးကလေး ဖြစ်သည်။ ထို့ကြောင့် ဘယကျော်ခေါင်က အကြီးဖြစ်သည်။ သို့သော် လက်ျာဘီလူးက ရိုသေလေးမြတ်ခြင်း မရှိ။ သူ့ကို သိပင် မသိ။

ဤအရေးကို တပ်မင်း နန္ဒကျော်သူ နှင့် ပြောဆိုတိုင်ပင်ဖြစ်သည်။ နန္ဒကျော်သူကမူ ချင့်ချင့်ချိန်ချိန် လုပ်စေချင်သည်။ သင်းမှာ အလကားနေရင်း ပလွှားနေသည် မဖြစ်တန်ရာ၊ အကြောင်းရှိရမည် ဟု ဆိုသည်။ ဘယကျော်ခေါင်က ထိုအကြောင်းကို တစ်ချက်တည်းနှင့် ကြေသွားစေချင်သည်။ လူပုံအလယ်တွင် နှိပ်ကွပ်၍ ဦးကျိုးသွားအောင် လုပ်လိုက်မည်ဟု ပြန်ပြော၏ ။

နောက်နှစ်ရက်တွင် မဟာနော်ရထာတပ်မှ ရှေ့ကင်းစစ်ရမည်ဖြစ်ရာ တပ်မှူး လက်ျာဘီလူး ပါလာလိမ့်မည်။ ထိုအချိန်တွင် စိန်ခေါ်၍ လက်ဝှေ့ နပန်းသတ်ပြီး အလောင်းမင်းတရားလူကို သားတော် ဆင်ဖြူရှင်၏ လူကအနိုင်ယူလိုက်မည် ဟု ကြံစည်နေသည်။ နန္ဒကျော်သူမှာ မလွယ်မှန်း သိသော်လည်း သန်မာကြမ်းတမ်းသော ဘယကျော်ခေါင်ကို ခွန်းတုံ့မဆိုတော့။

ဘယကျော်ခေါင်က စိန်ခေါ်လျင် အလွန်မဲမိုက်လှသော လက်ျာဘီလူးက အနက်တုံ့ တုံ့ပြန်လိမ့်မည်ဟု နန္ဒကျော်သူက တွက်ဆ ရာ ဘယကျော်ခေါင်က ''သင်းပေါင်မှာ ထိုးကွင်းမင်ကြောင်မှ မရှိတာ၊ ကလေးလို အဖြူတုံ့ပဲ တုံ့လို့ ရမှာပေါ့ဗျာ'' ဟု ရယ်သွမ်းသွေးလေသည်။ အဖြူတုံ့ ဆိုသည်မှာ မင်ကြောင်မထိုးရသေးသော ပေါင်ဖြူ ကလေးသူငယ်များ စိန်ခေါ်လက်ခံ၍ နပန်းသတ် လက်လှဲ စသည်တို့ ပြုလုပ်ကြခြင်း ဖြစ်သည်။

အနက်တုံ့မှာမူ လူရွယ် လူကြီးတို့ ဖက်ပြိုင်ခြင်း ဖြစ်သည်။ ''သည်အကောင် လွန်ရောကျွံရော မှောင်ရုံလောက်ပဲ မှောင်ရဲမှာပါ'' ဟု ဘယကျော်ခေါင်က ဆို၏ ။ နားရွက် တံတွေးဆွတ်လာသူကို ကိုယ်ချင်းတိုက်ကာ တုံ့ပြန်ခြင်းဖြင့် လက်ဝှေ့ နပန်း သတ်ကြမည်ဖြစ်ကြောင်း လက်ခံသည်ကို ဆိုလိုသည်။ နန္ဒကျော်သူကတော့ ကြိုက်နှစ်သက်ရာ လက်နက်နှင့် တိုက်ခိုက်နိုင်သည့် အမဲတုံ့ တုံ့လိမ့်မည်ဟု ထင်သည်။ အမဲတုံ့ဆိုလျင် လက်ျာဘီလူးက ဘယကျော်ခေါင်ကို ခြေဖြင့် ကန်ပေလိမ့်မည်။

အလွန်မိုက်မဲသည့် အမိုက်တုံ့ကိုမူ တုံ့လိမ့်မည်မဟုတ်ဟု ယူဆရသည်။ စိန်ခေါ်သူကို ပါးရိုက်လျင် အမိုက်တုံ့ဖြစ်ပြီး သေသည်အထိ တစ်ယောက်တစ်လှည့် ထုထောင်းခြင်းမျိုး ဖြစ်ရာ ဆင်နှင့်ဆိတ် အမိုက်တုံ့တော့ မတုံ့တန်ရာ။ သို့သော် လက်ျာဘီလူးမှာ မုဆိုးချုံဗိုလ် မင်းခေါင်နော်ရထာထက်ပင် မိုက်ကန်းသူဟုလည်း ဆိုကြပြန်ရာ တရားသေတော့ တွက်မရ။ အထူးသဖြင့် ရင်ဆိုင်မိလျင် ဘယ်တော့မှ မပြေး ဟု ပြောစမှတ်တွင်သူမို့ ရေဆုံးမြေဆုံး လုပ်မှာ စိုးရသည်။ သို့သော် အမိုက်တုံ့လျင် ဘယကျော်ခေါင်ကို မည်သို့မှ နိုင်စရာမရှိ။

သူတို့ စောင့်စားနေသည့် အချိန်သို့ ရောက်လာသည်။ တွေ့ကြပါပြီ။ မီးကျီးခဲလို တဟုန်းဟုန်း တောက်လာသည့် ဘယကျော်ခေါင်နှင့် မဟူရာကျောက်လို နက်မှောင်လျှို့ဝှက်လွန်းသည့် လက်ျာဘီလူးတို့ ရှေ့ကင်းဗိုလ်ပုံအလယ်မှာ ရင်ဆိုင်မိကြသည်။ ဘယကျော်ခေါင်က လာလမ်းရှေ့မှ ဆီးမိုး ပိတ်ရပ်လျက်…

''သွေးသောက်က လက်ျာဘီလူးလား''

''ဟုတ်ပါတယ်''

မည်သည့် အပိုစကားမှ မဆို၊ ချက်ချင်း လက်ကို တံတွေးဆွတ်ကာ လက်ျာဘီလူး၏ နားဆီ လက်လှမ်းလိုက်သည်။ သတင်းကြားဖြင့် စောင့်စားနေသည့် ပရိသတ်မှာ ရင်တမမ။ မထင်မှတ်ဘဲ လက်ျာဘီလူးက ကိုယ်ကို ယိမ်းကာ ရှောင်တိမ်းသွားသည်။ ဘယကျော်ခေါင်က ထပ်တို့မည်ပြုရာ လက်ကို ပုတ်ချလိုက်သည်။

''ဘယ်လိုလဲ သွေးသောက်… နာမည်ကြီးနေတော့ တစ်ပွဲတစ်လမ်း စမ်းလိုက်ကြရအောင်လား''

''ကျုပ် မပြိုင်ချင်ဘူး''

အားလုံး အံ့အားသင့်နေကြသည်။ လက်ျာဘီလူး၏ မာန်တွေ ဘယ်ရောက်ကုန်သနည်း။ နားရွက် တံတွေးဆွတ်လာလျင် ဓားထုတ် ပိုင်းချလိုက်မည်ကို သတိနှင့် စောင့်နေသော ဘယကျော်ခေါင်ပင် ဘာပြောရမည်မသိ။ နောက်မှ…

''သွေးသောက်… ကြောက်သလော''

''ကြောက်ပါသည်''

''ဟင်''

မထင်မှတ်သောစကား။ မည်သို့မျှ မျှော်လင့်မထားသည့် စကားလုံးများ။ လက်ျာဘီလူးနှုတ်မှ ကြောက်ပါသည် ဟု မကြားဖူးသော နောက်ပါရဲမက်များပါ အံ့သြနေကြသည်။ ကုန်းဘောင်နိုင်ငံတော် တည်ထောင်စဉ်က မိုက်မိုက်ကန်းကန်း တက်တိုက်လေ့ရှိသသူ ဟု သတင်းကြီးခဲ့သော လက်ျာဘီလူးမှ ဟုတ်ပါလေစ။ လူများ မှားနေသလား။

''မောင်မင်း လက်ျာဘီလူး ဟုတ်ပါတယ်နော်''

လက်ျာဘီလူးက မည်သို့မျှ မဆို။ ရှောင်ထွက်ဟန် ပြုသဖြင့် ဘယကျော်ခေါင်က တားပြီး

''ဒါဆို ကျုပ်ကို အရှုံးပေးတာလား''

လက်ျာဘီလူး တစ်ချက် စိုက်ကြည့်သည်။ အမျက်ဒေါသ မာန်မာန မရှိ။ ပကတိ မျက်နှာဖြင့်

''အရှုံးပေးပါတယ် တပ်မှူး''

''ကျုပ်ကြားဖူးတာတော့ လက်ျာဘီလူး ဆိုတာ ဘယ်သူ့ကိုမှ မကြောက်တတ်ဘူးဆို''

''သူများ ပြောတာ ယုံသလား၊ ကျုပ်ကိုယ်တိုင် နှုတ်က ကြောက်တတ်ပါတယ် ပြောတာ ယုံမလား''

ဝေါခနဲ စစ်သည်များ ရေရွတ်သံအောက်မှ လက်ျာဘီလူးနှင့် သူ့လူများ ထွက်ခွာသွားကြသည်။ ပုံမှန်အတိုင်းသာ ကင်းများကို စစ်နေသည်။ ဘယကျော်ခေါင်ကို ကြောက်၍ အရှုံးပေးလိုက်သော လက်ျာဘီလူးကို သူ့လူများက မကျေနပ်ကြသလို အစစ်ခံရသော စစ်သည်များကပင်လျင် မလေးစားကြတော့သယောင် ထင်ရသည်။

လက်ျာဘီလူး နာမည်ကျဆင်းသွားလေပြီ။ ဘယကျော်ခေါင်အမည်သာ ဟိုးဟိုးကျော်နေတော့သည်။ နေပြည်တော်တစ်ဝန်း စစ်သည်တော်များအတွင်းတွင် ထိုအကြောင်းကို အမျိုးမျိုး ပြောဆိုလျက် ရှိကြ၏ ။ လက်ျာဘီလူးတပ်သားများမှာ သူတို့တပ်မှူးကို မပြောရဲသော်လည်း မခံချင် ဖြစ်နေသူများ ရှိသလို အကြောင်းသိသူများကတော့ မည်သို့မှ ဖြစ်မနေ။ လက်ျာဘီလူး ဆိုတာ အဲလိုပါပဲ ဟုသာ ဆိုကြလေသည်။

မကြာမီ စစ်သူကြီး နေမျိုးသီဟပတေ့က ဘယကျော်ခေါင်ကို ခေါ်တွေ့သည်။ ညွှန်ကြားစရာ ရှိသည်များကို ညွှန်ကြားပြီး နောက်ဆုံးတွင်မှ

''မောင်မင်းကို လက်ျာဘီလူး ကြောက်၍ အရှုံးပေးသွားကြောင်း လျှောက်ပြောနေသဆို''

''မှန်ပါ၊ အလောင်းမင်းကြီးလူ ဟူ၍ အသားလွတ် ထောင်လွှားနေသောကြောင့် ဆုံးမလိုက်ရခြင်းပါ''

''မင်းကို ဘယ်သူက ကြောက်ပါတယ် ပြောသနည်း''

''လက်ျာဘီလူးကိုယ်တိုင် ကျွန်တော်မျိုး ရှေ့မှောက်မှာ အတိအလင်း ထုတ်ဖော်ပြောသွားကြောင်းပါ''

''မင်းကို ကြောက်ပါသည် လို့ ပြောသလား''

''သည်အတိုင်းပဲ ပြောပါသည်''

''မဖြစ်နိုင်၊ နားလည်မှု လွဲသည် ဖြစ်ရမည်။ ငါတို့ ဘဝရှင်မင်းတြားကြီးကို လူပုံအလယ် ပွဲမှာ အကြောက်အလန့်မရှိ ပြောသွားတာ မြင်ရဲ့ မဟုတ်လား။ အလောင်းမင်းတရားကိုတောင် ရောင်းရင်းဖက်တွေလို ရဲရဲဝံ့ဝံ့ ပြောဆို ဆက်ဆံဝံ့တာ သင်းတစ်ယောက်ပဲ ရှိသည်။ နင်လိုကောင်ကို အဖက်လုပ်မည်မထင်''

ဘယကျော်ခေါင် မကျေမနပ် ဖြစ်သွားသည်။ စစ်သူကြီးကအစ သင်းကို အထင်ကြီးလွန်းနေသည်။ သင်းကဖြင့် မယှဉ်ရဲလို့ ဗိုလ်ပုံအလယ်မှာပင် ရှောင်ပြေးသွားခဲ့သူ။

''အကောင်သေးသလောက် မခန့်လေးစား ပြုမူတတ်သော အဲသည် လက်ျာဘီလူးနှင့် တစ်ယောက်ချင်း ကြိုက်ရာလက်နက်ရွေး၍ သတ်ရဲပါသည်ဘုရား''

''အိမ်း… သဘောပေါက်ပြီ…၊ သဘောပေါက်ပြီ။ လက်ျာဘီလူး ဘာကို ကြောက်သည်ကို မောင်မင်း မသိပေမည့် ငါ ရိပ်မိပြီ။ အတွေ့အကြုံနည်း၍ မရင့်ကျက်သူများမှာ ဤသို့ပင် ဖြစ်တတ်သည်။ နောင် စစ်ရေးစစ်ရာ ကြုံပါများလာသောအခါ နားလည်လာလိမ့်မည်။ သွားတော့… သွားတော့''

မကြာမီ မဏိပူရ ကသည်းနယ်မှ ပုန်ကန် ထကြွလာသည်။ ဧရာဝတီမြစ်ရေကို မွန်မြတ်သောရေ ဟု လာယူရာမှ မြန်မာတို့နှင့် အချင်းများကာ ပုန်ကန်ခြင်း ဖြစ်၏ ။ ဆင်ဖြူရှင် အမိန့်တော်ကြောင့် စစ်သူကြီး နေမျိုးသီဟပတေ့ က ဘယကျော်ခေါင်နှင့် တပ်တစ်တပ်ကို နှိမ်နင်းရန် လွှတ်လိုက်သည်။ ကသည်းတို့သည် နယ်မြေကျွမ်းလှသည်။ အမဲလိုက်နေသော မုဆိုးမျိုးနွယ်များ ဖြစ်သည့်အပြင် မြင်းရေးတွင် သူမတူအောင် အစွမ်းထက်သည်။ သူပုန်နယ်ထဲ အတင်းဝင် အတင်းတိုက်သော ဘယကျော်ခေါင်မှာ ထောင်ချောက်မိကာ တပ်ဆုတ်ရလေတော့သည်။

လက်ျာဘီလူးကို အောင်နိုင်သဖြင့် ဝံ့ကြွားနေသော ဂုဏ်များမှာ ရန်သူအစစ်ဖြစ်သော ကသည်းတပ်နှင့် တွေ့သောအခါ ပျောက်ကွယ်သွားသည်။ ကသည်းတို့အစွမ်းကို လေးစားခန့်ညားရပြီ။ ကသည်းခေါင်းဆောင်များ မြင်းရေးပြကြသည်ကို ငေးမောနေရသည်။ ကြီးမားသော ကသည်းမြင်းတို့နှင့် မယှဉ်နိုင်။ ခွာ၍ ရံတပ်သာ တည်နေရ၏ ။

နေမျိုးသီဟပတေ့က တောင်း၍ မဟာနော်ရထာက သူ့လူ လက်ျာဘီလူးကို ကသည်းမြေသို့ စစ်ကူထည့်ပေးလ်ိုက်သည်။ သူရဲနှစ်ဦး ပြန်တွေ့ကြပြန်ပြီ။ သို့သော် မသင့်မတင့် မဖြစ်။ လက်ျာဘီလူးကလည်း ဘယကျော်ခေါင်ကို လေးလေးစားစား ဆက်ဆံဖော် ရသလို ဘယကျော်ခေါင်ကလည်း နိုင်သူဟူ၍ မဖိနှိပ်။ ကောင်းကောင်းမွန်မွန်ပင် ပြောဆို ဆွေးနွေး၏ ။

ကသည်းတပ်က ရံမြို့ကို လေးမြားဖြင့် လာပစ်ပြီး မြို့ပြင်မှ မြင်းရေးပြနေကြသည်ကို မြန်မာအများ သစ်လုံးတပ်ထိပ်မှ ကြည့်နေကြ၏ ။ ဘယကျော်ခေါင်က လက်ျာဘီလူးနှင့် စစ်ကူတပ်မှူးများကို ခေါ်၍ ပြရာ လက်ျာဘီလူးက မပြောမဆိုနှင့် သူရဲတစ်ဦးထံမှ လှံကို ဆွဲကာ ကသည်းခေါင်းဆောင်လာသူထံ လှံလျင်နှင့် လွှတ်လိုက်သည်။ ထုတ်ချင်းပေါက်၍ မြင်းပေါ်က ကျလေသည်။ ကသည်းမြင်းတပ် ရုတ်ရုတ်သဲသဲ ဖြစ်နေတုန်း

''စစ်မှာ သူက ပြတာကို ကြည့်မနေရဘူး။ သူက ခြောက်တာကို ကြောက်မနေရဘူး။ သည်လိုပဲ လုပ်ရတယ်''

ဟု ပြောပြောဆိုဆို ဆင်းသွားပြီး မြင်းကြီး တိမ်ပျံကို ယူ၍ တံခါးဖွင့်ကာ ထွက်သွားတော့သည်။ ဘယကျော်ခေါင်တို့ ကြောင်ကြည့်နေကြသည်။ ကသည်းတပ်ဆီ သူ ထွက်သွားတော့မှ သတိရကာ စစ်ရေးအပြင်အဆင်များ လုပ်ရသည်။ စစ်မောင်းတီး၍ အုံးအုံးကြွက်ကြွက် တပ်လှန့်လိုက်သည်။ လက်ျာဘီလူးကတော့ ရန်သူများထံ လှံတို တစ်ချောင်းပြီးတစ်ချောင်း လွှတ်ကာ မြင်းတစ်စီးတည်း ပြေးလိုက်သွားသဖြင့် ရန်သူတပ်များက မြားနှင့် ပြန်ပစ်ကြသေးသည်။ မထိရောက်မှန်း သိသောအခါ ဆုတ်ခွာပြေးသွားကြသည်။

မြန်မာတပ်များလည်း ကသည်းတို့ ပြေးရာသို့ ထွက်လိုက်ကြသည်။ လမ်းတွင် ကသည်း မြင်းသည် နှစ်ဦး သုံးဦး လဲကျနေသည်ကို တွေ့ရ၏ ။ ထို့နောက် တစ်ယောက်၊ ထို့နောက် တစ်ယောက်။ တစ်ယောက်ပြီး တစ်ယောက်။ လက်ျာဘီလူးကိုကား မတွေ့။ ကသည်းရွာထဲ ဝင်သွားသည် ဟု မြင်လိုက်သူတို့က ဆိုကြသဖြင့် လိုက်ကြရပြန်သည်။

ရွာထဲတွင် ကမ္ဘာပျက်နေသကဲ့သို့ရှိ၏ ။ ဆူးချွန် အရံအတားများကို ခုန်ဝင်၍ မြင်မြင်ရာ ယောက်ျားဟူသမျှတို့ကို လိုက်လံထိုးခုတ်နေဟန် ရှိသည်။ မြင်းနှင့် ဝင်လာလျင် မြင်းကို ခုတ်သည်။ အိမ်ပေါ်မှ ဒူးလေးဖြင့် ပစ်လျင် အိမ်တိုင် ကြမ်းများကိုပါ ခုတ်ချ၍ တက်လိုက်သည်။ တစ်ယောက်တည်း ထင်တိုင်းကြဲနေတော့သည်။ လင့်စင်ပေါ် နေသူကို တိုင်များ ခုတ်ချသည်။ သေနတ်သံ တဖောင်းဖောင်း၊ ဒူးလေးသံ တရွှီရွှီကြားမှာ ဘီလူးစီးနေသည့် လူသားတစ်ဦးက ရမ်းချင်တိုင်း ရမ်းနေလေပြီ။ အလွန်ဆိုးသွမ်းသော လက်ျာဘီလူးပါတကား။

ကသည်းများနှင့် ဘယကျော်ခေါင်ပင် ထိုတစ်ပွဲတည်းနှင့် လက်ျာဘီလူးကို လန့်သွားသည်။ သူပုန်တပ်များ ကြပ်ကြပ်မတ်မတ် ပြင်ဆင်နေကြပြီ ဖြစ်သလို မြန်မာတပ်များလည်း အလွန် အားတက်လာကြသည်။ ရန်သူကို လူမထင်သလောက် အချင်းချင်း တိုက်ခိုက် ပျက်ဆီးရမည်ကို ကြောက်သော လက်ျာဘီလူး၏ စိတ်ကို ယခုမှ တပ်မှူးကြီး ဘယကျော်ခေါင်တစ်ယောက် နားလည်လာသလို ရှိလေသည်။

Written by သင်္ခရာဇာ

End date: November 13, 2021