"လက်ျာဘီလူးကို ခေါ်ခဲ့ချေ"
ဝန်ကြီး၏ အမိန့်ကြောင့် စည်းဝေးပွဲတက်နေသော ဗိုလ်မှူး တပ်မှူး စစ်ကဲအပေါင်းတို့ထံမှ အာမေဋိတ်သံများ ကျယ်ကျယ်လောင်လောင် ထွက်လာကြလေသည်။
လက်ျာဘီလူး ဆိုသည်မှာ ရူးသွပ်နေသော၊ သောင်းကျန်းလှသော၊ ရက်စက်လှသော၊ ခက်ထန် ရိုင်းစိုင်းလှသော၊ ထိန်းမနိုင် သိမ်းမရ ဖြစ်နေသူ ရာဇဝတ်သားတစ်ဦး ဖြစ်နေသောကြောင့်ပင်။ မနေ့ကမှ တပ်သားတစ်ဦးအား အကြောင်းမဲ့ ပြေးဝင် ထိုးနှက် ကန်ကျောက် တိုက်ခိုက်ခဲ့သဖြင့် ဝိုင်းဖမ်းပြီး တိုင်တွင် သံကြိုးတည်းကာ နေ့ည နေလှန်းထားရသူလည်း ဖြစ်၏ ။
ထိုသို့သော သူမျိုးကို ယခုလို အရေးကြီး စစ်ရေးဆွေးနွေးပွဲသို့ ခေါ်ဆောင်လာရမည် ဆိုသည်မှာ မသင့်လျော်မှန်း အားလုံးက သိနေကြ၏ ။ သူ၏ ကြမ်းတမ်းသော စရိုက်လက္ခဏာနှင့် ကြားခဲ့ရသည့် သတင်းများကြောင့်လည်း အားလုံးက ရွံကြောက်ကြီး ဖြစ်နေကြရသည်။
ရှမ်းမြို့တော်ကို မီးရှို့ဖျက်ဆီးပြီး ပုခက်တွင်းကလေးပါမကျန် သတ်ဖြတ်ပစ်ခဲ့သည် ဆိုသော သူရူးတပ်မှူးတစ်ဦးအား အချို့က အရှင်ပင် မထားသင့်တော့ဟု မြင်နေကြချိန်၊ အချိန်မရွေး အချင်းချင်း အန္တရာယ်ပြုနိုင်ပြီး ကြောက်မက်ဖွယ် အစွမ်းလည်း ကြီးမားသည့် စိတ်လွတ်နေသူမို့ စည်းဝေးပွဲသို့ မဆောင်ကြဉ်းသင့်ကြောင်း သေနာပတိ ဝန်ကြီး မဟာသီဟသူရအား တစ်ယောက်တစ်ခွန်း လျှောက်တင်လာကြ၏ ။
မဟာသီဟသူရက သူတို့ တင်သမျှကို နားထောင်နေပြီးမှ အားလုံးကို တစ်ခွန်းတည်းသာ မေးလိုက်သည်။
"ကိုင်း..၊ သည်လိုဆို ယခုအရေးကို နင်တို့ ဖြေရှင်းနိုင်စွမ်းမည်လား"
ဗိုလ်မှူးစစ်ကဲတို့ မဖြေနိုင်အောင် ယခု ကြုံနေရသော တရုတ်တပ်ကြီးက တိုး၍ မပေါက်၊ တိုက်၍ မကြေ၊ မာကျောကြံ့ခိုင်လွန်းနေသဖြင့် ကပ်မိသမျှ အကျအဆုံး ထိခိုက်ရှနာ များလှသည်သာ အဖတ်တင်လျက် မတုန်မလှုပ် ရှိနေရသည်။
သူတို့ အင်းဝတပ်တော်များလည်း အကြိမ်ကြိမ် ကြိုးခဲ့ပြီးပြီ။ နည်းလမ်းမျိုးစုံလည်း သုံးခဲ့ရပြီး အရာမထင် အရေးမရ။ ယခုထိ တရုတ်တို့ အင်အားပင် မချည့်နဲ့သေးဘဲ တောင့်တင်းခိုင်မာဆဲ ဖြစ်သည်။ ယိုးဒယားမှ ပြန်လာကြသော တပ်များ ရောက်လာသော်လည်း စစ်ပန်းနေသဖြင့် အကူမကောင်း၊ မထောင်းတာလှ။ အရေးထဲ လက်ျာဘီလူးက သည်းခြေပျက်နေသေးသည်။
အားလုံး အခက်တွေ့နေချိန် ဖြစ်သော်လည်း စိတ်မမှန်သော လက်ျာဘီလူးကို သံကြိုးတည်းနှောင်ထားရာမှ ဖြည်၍ ခေါ်လာရမည် ဆိုသည်ကိုမူ မကြိုက်ညီကြချေ။ ဝန်ကြီးကလည်း အခြေနေကို သိပါလျက် သူရူးကို အဘယ်ကြောင့် ပွဲသဘင်သို့ ဆောင်ယူစေရသနည်း။ အကြောင်းရှိပါ၏ ။
ယခုကဲ့သို့ အရေးကြုံလျင် သင်းထံမှ အကြံကောင်း ဉာဏ်ကောင်းများ ထွက်ရတတ်သည်ကို မကြာခဏ ကြုံသိကြားဖူးခဲ့သောကြောင့်တည်း။ သူ့အား ဗိုလ်မှူး ဦးကောင်းလည်း အားကိုးခဲ့၏ ။ ဗိုလ်မင်း ဦးတွန်လည်း အားထားခဲ့၏ ။ မဟာနော်ရထာ၊ နေမျိုးသီဟပတေ့တို့ ထံမှလည်း သတင်းကြားရဖူး၏ ။ အခက်အခဲရှိက ပြီးပြေလွယ်သော စွမ်းရည်သတ္တိ သင်းထံတွင် ရှိ၏ဟု ဗိုလ်မင်းများ ဆိုခဲ့ကြသည် မဟုတ်လော။
ထို့ကြောင့် စိတ်ကစဉ့်ကလျား ဖြစ်ကာ မူမမှန်သော ကာလ ဖြစ်လင့်ကစား သူ့ထံမှ မည်သည့် အကြံအစည် စကားမျိုး ကြားရနိုင်မည်နည်းဟု မျှော်လင့်မိသော ဝန်ကြီးက ကောက်ရိုးမျှင်ကို ဆွဲကြည့်လိုက်ခြင်း ဖြစ်ပေသည်။ ကြွက်စီကြွက်စီ ရှိနေကြသော စည်းဝေးပွဲဆောင်ကြီးမှာ သံကြိုးတန်းလန်းနှင့် ပေတေစုတ်ပြတ်နေသည့် အကျဉ်းသား ဝင်လာသောအခါ ငြိမ်ကျသွားလေသည်။
ရာဇဝတ်သားထံမှ သံကြိုးဆွဲလာသံက စိတ်မချမ်းမြေ့ဖွယ်ရာ၊ ဝါးကြမ်းများကို တဗျောဗျော ပွတ်တိုက် ထွက်ပေါ်နေပြီး အသံရပ်သွားမှ
"လက်ျာဘီလူး.. ငါ့ကို မှတ်မိသလား"
လက်ျာဘီလူးက ဆံပင်ဖရိုဖရဲများကြားမှ ဝန်ကြီးကို မျက်လုံးလှန်ကြည့်သည်။ မည်သည့်စကားမျှ မဆို၊ မည်သည့်ခံစားချက်မျှ မရှိဟန်။
"ငါ ဝန်ကြီး သီဟသူရ"
"သိပါတယ်"
တိုပြတ်ပြတ်အသံက မခန့်လေးစား ထွက်လာသော်လည်း မဟာသီဟသူရ အားတက်သွားသည်။ အခြေအနေ ကောင်းသည်ဟု ယူဆရ၏ ။
"မင့်ကို ဘာလို့ နှောင်ကြိုးတည်းထားရသလဲရော သိသလား"
"သူယုတ်ကို ကိုယ့်သဘောနဲ့ကိုယ် ဆုံးမလို့"
"ဟေ"
ဝန်ကြီးက ခေါင်းညိတ်နေသော်လည်း ဗိုလ်မှူးတစ်ဦးက ကြားဝင် လျှောက်လာသည်။
"ဤသူ ကြည့်ရသည်မှာ သက်လုံမကောင်း၊ ဘဝင်မငြိမ်၊ သူ့ထံမှ အကျိုးရဖွယ် မမြင်။ မထင်လျင် အန္တရာယ်ကြီး ပြုမည့်သူ ဖြစ်ပါသည်။ သူရူးကို အားကိုးတော်မမူစေချင်ပါ ဘုရား"
အခြားတစ်ဦးကလည်း
"ကျွန်တော်မျိုးများ ဝိုင်းဝန်းကြံစည် လုပ်ကြံရလျင် သည်တရုတ်တပ်ကြီး ခံနိုင်မည် မဟုတ်ပါ။ အချိန်အခါကောင်း စောင့်ရင်း အားမွေးထားရသော် သင့်၏ မဟုတ်လား မင်းကြီးဘုရား"
"နင်တို့ နေကြ၊ သင်းကိုငါ မေးစမ်းပါဦးမည်"
နှာခေါင်းကို ရှုံ့ကာ တံတွေး ထွေးလိုက်သော လက်ျာဘီလူးအား ဝန်ကြီးက
"ငါတို့ သည်မှာ ကြာနေရသည့် အကြောင်းကို သင် သိသလား မောင်မင်း"
အတန်ကြာသည်အထိ လက်ျာဘီလူး မဖြေ၊ ငြိမ်နေရာ
"တရုတ်တပ်ကြီးတစ်တပ်သည် အင်အားအပြည့်နှင့် အလုံးအရင်း ရပ်ခံနေသည်။ ရွှေတပ်တော်သားတို့ ရွပ်ရွပ်စွတ်စွတ် လုပ်ကြံသော်လည်း မပေါက်ခင်လေ၊ ငါတို့ အကြံအစည်ညံ့၍ သူတို့က သာသယောင် ရှိ၏"
ရုတ်တရက် လက်ျာဘီလူးက
"မညံ့ပါဘူး၊ သူတို့ကိုက သာတာပါ"
ဝန်ကြီး ပြုံးလိုက်သည်။ သူလိုချင်သည့် အချက်တစ်ခုကို သိလိုက်ရပြီ။ လက်ျာဘီလူးကို ဆွ ၍ မေးက ရနိုင်၏ ။ သို့သော် ရန်သူက သာသည်ဆိုသော စကားကိုမူ အများက မနှစ်သက်ကြ။
"သည်အရူး ကြောက်နေပြီ။ ကျွန်တော်တို့..."
မဆွက ကြားဖြတ် လျှောက်တင်ခဲ့သော ဗိုလ်သည် ဝန်ကြီးအား ထပ်ပြောရန် ကြိုးစားစဉ် လက်ျာဘီလူးက မထင်မှတ်ဘဲ ထိုသူကို လှည့်ကန်လိုက်၏ ။
"ဘုန်း"
"အင့်"
"ဝုန်း"
"ဟယ်"
အားပါလှသဖြင့် လွင့်ထွက်သွားပြီး ခုံများ လဲပြိုကုန်သည်။ ဗိုလ်မှာ ရင်ကို ဖိရင်း ဒေါသတကြီး ထလာရာ လက်ျာဘီလူးက ဆီးပြောလေသည်။
"လာလေ၊ လာတိုက်စမ်းပါ အရူးရဲ့"
ခြေကို ချဲကားလျက် စိန်ခေါ်နေသည်။ ဝန်ကြီးကို ကြည့်ရာတွင်လည်း မည်သို့မျှ အရေးမယူ စကားမဆိုဘဲ ပြန်ကြည့်နေသည်ကိုသာ တွေ့သောကြောင့် ကန်ခံရသော ဗိုလ်မှာ မကျေမနပ်နှင့် ရပ်နေရလေသည်။
"ဘာလဲ၊ ငါနဲ့ မတိုက်ရဲဘူးလား.. ဟုတ်စ"
"မင်းလိုကောင်ကိုလား၊ သနလို့ကွ"
ဗိုလ်က ဘေးသို့ ထွီခနဲ ထွေးရာ လက်ျာဘီလူး ပြုံးသွားပြီး
"ဘယ်သူ ဖြတ်ပြောဦးမလဲ။ ဘယ်သူ လူစွမ်းကောင်း လုပ်ကြဦးမလဲ"
ဟု မေးရင်း ထွီခနဲ ပြန်ထွေး၏ ။ ဗိုလ်မှူးတစ်ဦးကို ပြန်လှန် ကန်သည့် ရာဇဝတ်သားအား ဝန်ကြီးက အရေးမယူသည့်အပြင်
"သူတို့ကို အရေးမလုပ်နဲ့။ ငါမေးတာပဲ ဖြေပါ မောင်မင်း။ ဟောဟိုက တရုတ်တပ်ကြီးကို မြင်ရဲ့လား။ အင်အားအထပ်ထပ်နဲ့ တပ်တည်တပ်ရံ ကောင်းနေတော့ တို့က မတက်နိုင် ဖြစ်နေတာ"
"မနိုင်ရင် မတိုက်နဲ့ပေါ့"
ဗိုလ်မှူးအများမှာ လက်ျာဘီလူးကို ခုတ်ချင်လှ၍ ဓားကို ဖိထားရသည်။ ဝန်ကြီးကို မလေးမစား လုပ်နေသော အရူးအား စီရင်ပစ်စေလိုနေပေပြီ။ ဝန်ကြီးကတော့ သည်းခံလျက်သား။
"သို့ဆိုလျင် ဘယ်သို့ ပြုရမည်လဲ"
"တပ်ဆုတ်လေ"
"တို့က ဆုတ်တော့ သူက တက်လာမှာပေါ့"
"မလာပါဘူး၊ လာ.. လာပေါ့"
ဝန်ကြီး မျက်မှောင်ကျုံ့နေပြီ။
"ဘာလို့လဲ"
"တက်လာရင် တည်ထားတာ ပျက်သွားမယ်"
"အေ.."
သဘောပေါက်လိုက်ပြီ။ လက်ျာဘီလူး၏ အမြင်မှာ ရိုးစင်းလှပါကော။ ထို့ပြင် လက်ျာဘီလူး၏ အစွမ်းကိုပါ မျက်ဝါးထင်ထင် သိလိုက်ရသကဲ့သို့ ဖြစ်သွားလျက် စားပွဲကို လက်ထောက်ကာ စူးစိုက်ကြည့်နေမိသည်။ လက်ျာဘီလူးကလည်း သူ့ကို စိုက်ကြည့်နေ၏ ။
ဝန်ကြီး၏ အမြင်ဝယ် လက်ျာဘီလူးသာ မိမိကဲ့သို့ ဦးဆောင်သူ ဖြစ်ပါက ဤပွဲတွင် မနိုင်နိုင်လျင် နောက်သို့ ဆုတ်လိမ့်မည်။ ရန်သူတပ်အရွေ့ အပြောင်းကို စောင့်၍ အကဲခတ်ကာ အားနည်းချက်ရှာ တိုက်ရန် ကြည့်လိမ့်မည်။ မမြင်လျင် အခြေအနေ အရပ်အရာ ပထဝီကို သုံးသပ် တိုက်လမည်။ သို့တည်းမဟုတ်...
စစ်ဘုရင် မဟာသေနာပတိက သူ့အား ကြည့်ရင်း တွေးနေသည်တို့ကို လက်ျာဘီလူးကလည်း မျက်လုံးများမှ တဆင့် သိမြင်သွားပြီး လှည့်ပြန်သွားလေသည်။ သူ၏ နောက်၌ အစောင့်နှစ်ဦး လှံနှင့်ထောက်ကာ သတိကြီးစွာ လိုက်ပါသွားကြသည်။ သံကြိုးခတ်သံ၊ ပွတ်တိုက်သံတို့ကို မဟာသီဟသူရ မကြားတော့။
လက်ရှိအချိန်၌ သူ့အမြင် သူ့စိတ် သူ့ရင်တွင်းဝယ် ကြားယောင်နေမိသည်မှာ စစ်သူကြီးချုပ် ဗိုလ်မှူး မင်းထင်နော်ရထာ၏ နည်းဗျူဟာမြောက် အော်ဟစ်ကွပ်ကဲ အမိန့်ပေးနေသံများသာ ဖြစ်တော့သည်။ သူ၏ ဝေသီသော မျက်လုံးများရှေ့တွင် အလောင်းမင်းတရား၏ အရှေ့ဝင်းတော်မှူး ဗိုလ်ချုပ်ကြီး မင်းထင်နော်ရထာသည် ခဲခက်လှစွာသော တရုတ်တပ်ကြီးအား တစ်ဆင့်ချင်း မျှားခေါ် ခြွေချ ဖျက်ဆီးနေသည့် ပုံရိပ်များကို မြင်ယောင်နေမိလေသည်။
Written by သင်္ခရာဇာ
End date: March 27, 2022